Daxili siyasət

Ana səhifə

Daxili siyasət

Ərzurumda “Türk-erməni münasibətləri” adlı II beynəlxalq konfrans keçiriləcək

13 iyun 2007 08:46 (UTC +04:00)

İyunun 21-22-də Türkiyənin Ərzurum şəhərində “Türk-erməni münasibətləri” adlı II beynəlxalq konfrans keçiriləcək. APA-nın məlumatına görə, Azərbaycanı bu toplantıda Milli Məclisin üzvü Qənirə Paşayeva və AMEA-nın Tarix İnstitutunun direktor müavini Cəbi Bəhramov təmsil edəcəklər. Q. Paşayevanın APA-ya verdiyi məlumata görə, konfransda dünyanın müxtəlif yerlərindən Avropa Birliyinə üzv ölkələrdən və ABŞ-dan mütəxəssislər, tarixçilər, elm adamları iştirak edəcək. Konfransı keçirməkdə məqsəd ermənilərin qondarma “soyqırım” iddialarının yalan olmasını üzə çıxarmaq, tarixi sənədlərə əsaslanaraq nə baş verdiyini müzakirə etməkdi: “Tədbirin Ərzurumda keçirilməsi təsadüfi deyil. Burada 1915-ci ildə ermənilər türklərə qarşı çox böyük qətliamlar törədib, orada çoxlu toplu məzarlıqlar aşkarlanıb və bu proses hələ də davam edir”. Deputat həmçinin bildirib ki, konfransa Ermənistanda və dünyanın müxtəlif yerlərində yaşayan erməni alim və mütəxəssisləri də dəvət alıblar, lakin bu günə kimi onlar tədbirdə iştirak edəcəklərini təsdiqləməyiblər: “Onlar mütəxəssislər səviyyəsində bu məsələnin müzakirəsindən hər zaman yayınırlar. Çünki bilirlər ki, uydurduqları yalan və iftiralar üzə çıxacaq”. Q. Paşayevanın sözlərinə görə, konfransın bir bölümü Ermənistanın Azərbaycan ərazilərini işğal etməsi, tarixən ermənilərin azərbaycanlılara qarşı törətdiyi soyqırımı, Dağlıq Qarabağ münaqişəsi və dünyadakı reallıqların müzakirəsinə həsr olunacaq: “Hər iki mövzu ilə bağlı çıxışlar edəcəyik, xəritələr və lazımi materiallar paylayacağıq ki, əcnəbi qonaqlar bu məsələ ilə bağlı daha bilgili olsunlar”. /APA/