Daxili siyasət

Ana səhifə

Daxili siyasət

Qubad İbadoğlu erməni saytında onun adından yayılmış müsahibəni təkzib edən bəyanat yayıb

25 iyun 2007 14:33 (UTC +04:00)

İqtisadi Tədqiqatlar Mərkəzinin direktoru Qubad İbadoğlu Ermənistan mətbuatında onun adından yayılmış açıqlamanı təkzib edən bəyanatla çıxış edib. Q. İbadoğlunun APA-ya daxil olan bəyanatında bu il iyunun 21-də www.azg.am saytında A. Həsənova adlı bir nəfərin müəllifliyi ilə “Təbliğat çoxdur, nəinki gerçək iş” adı altında yayılmış xəbərdən təəssüfləndiyini bildirib və bunu təxribat kimi qiymətləndirib: “Bu müsahibə mənə məxsus deyil. Mən heç bir erməni saytına və ya jurnalistinə müsahibə verməmişəm. Həmin xəbərdə qeyd olunan fikirlər mənə məxsus deyil, tanımadığım jurnalistin və saytın özfəaliyyətidir”. Q. İbadoğlu son bir ayda ümumiyyətlə, Azərbaycanda olmadığını, xarici səfərlərində isə nəinki erməni, ümumiyyətlə, əcnəbi jurnalistlərlə təmasının olmadığını da vurğulayıb: “Elə buna görə də yayılmış informasiyadan gec xəbər tutmuşam. Buna görə də bu hadisəyə vaxtında münasibət bildirə bilməmişəm”.
Q. İbadoğlu baş verənləri pisləyib və məsələni bəyanatla bitirməyəcəyini də qeyd edib: “Mən Vətənimə ziyan gətirən və onun regiondakı inkişafına kölgə salan bu yazıya dözüm nümayiş etdirmək fikrində deyiləm. Bu məsələ ilə əlaqədar mütləq həmin sayta müraciət edərək, təkzib verilməsini tələb edəcəyəm”. /APA/