Daxili siyasət

Ana səhifə

Daxili siyasət

Azərbaycan əcnəbi vətəndaşlara verilən viza blankının təsviri və spesifikasında dəyişikliklər edib

27 iyun 2007 08:07 (UTC +04:00)

Nazirlər Kabineti “Azərbaycanın xarici ölkələrdəki səfirlik, konsulluq və başqa diplomatik nümayəndəlikləri tərəfindən ölkədən getmək və ölkəyə gəlmək üçün əcnəbi vətəndaşlara verilən viza blankının təsviri və spesifikasiyası”nın təsdiq edilməsi haqqında” 2003-cü il 1 dekabr tarixli qərarında dəyişikliklər edib. Bu barədə “APA-Economics”ə Nazirlər Kabinetindən məlumat verilib.
Dəyişikliklərə əsasən, viza blankı 80x120 mm ölçülü, üfüqi şəkildə küncləri yarımdairəvi formada olan bir səhifədən və kötükdən ibarətdir və arxa hissəsi yapışqanlıdır. Kağızın tərkibi 100% sellülozdan olan viza blankı ofset, çoxçalarlı intaqlio və metalloqrafik üsulla çap olunur. Kağız, istifadə olunmuş boya və yapışqan viza blankının lazer printerində çap olunması üçün müvafiq hərarət dərəcəsinə davamlı olmalıdır. Viza blankının üzərində görünən və görünməyən formada Azərbaycanın dövlət simvolları, mərkəzi hissəsində böyüdülmüş formada Azərbaycanın dövlət gerbi göstərilir. Viza blankının maşınla oxuna bilən hissəsi ikizolaqlı, səthi hamardır. Viza blankının kağızının tərkibində görünən və flüoresent liflər vardır. Viza blankının istehsalı üçün istifadə olunan kağız optik cəhətdən ultrabənövşəyi şüaları əks etdirmir. İstehsalında giyoş, mikro çap və qabarıq çap üsullarından istifadə olunur. Viza blankının şəxsi məlumatlara aid hissəsi “göy qurşağı” çap üsulu ilə təsvir olunur. “VİZA” sözünün yazılışında optik dəyişən mürəkkəbdən istifadə edilir. Viza blankının seriyası və nömrəsi maqnetik mürəkkəblə çap edilir. Viza blankındakı bir sıra elementlər infraqırmızı optik mürəkkəblə təsvir olunur və qoruyucu əlamətlər viza blankının üzərində proporsional şəkildə yerləşdirilir. Viza blankının üzərində Azərbaycanın dövlət gerbi həkk olunmuş kiçik ölçüdə holloqram və ya kineqram vardır. Viza blankı üçün istifadə olunmuş kağız, boya və yapışqan ən azı 10 il keyfiyyətini və xüsusiyyətini saxlamalıdır. Bundan başqa, viza blankının üzərində, onu pasportdan qoparmağa çalışarkən vizanın bir neçə hissəyə bölünməsinə gətirib çıxaran kəsiklər var. /APA-Economics/