Daxili siyasət

Ana səhifə

Daxili siyasət

AŞPA Monitorinq Komitəsinin sabah keçiriləcək iclasında Azərbaycanda medianın durumu məsələsi müzakirə olunacaq

27 iyun 2007 10:05 (UTC +04:00)

Bu eksklüziv açıqlamanı APA-nın AŞPA-nın yay sessiyasının işini işıqlandıran Avropa bürosunun əməkdaşına AŞPA Monitorinq Komitəsinin Azərbaycan üzrə həmməruzəçisi Andres Herkel verib. O, Azərbaycanda kütləvi informasiya vasitələrinin vəziyyətinə dair məsələnin iyunun 28-də Monitorinq Komitəsində müzakirə olunacağını deyib: “Monitorinq Komitəsinin bu gün keçirilən iclasında çoxlu məsələlər müzakirə olunduğuna, ayrı-ayrı hesabatlar və Ukrayna ilə bağlı müzakirələr getdiyinə görə, bu iclasda Azərbaycanın öhdəlikləri ilə bağlı məsələnin müzakirə oluna bilməyəcəyini əvvəlcədən bilirdik. Buna görə də, Azərbaycanla bağlı məsələ iyunun 28-də müzakirə olunacaq. Bu iclasda Azərbaycandan başqa Rusiya və Monakonun da məsələləri müzakirə ediləcək”. Andres Herkel Azərbaycanla bağlı iki əsas məsələnin diqqət mərkəzində olacağını bildirib: “Açıq şəkildə deyirəm ki, Azərbaycanda məlum problemlərin mövcudluğu ədliyyə sisteminin adekvat olmamasından irəli gəlir. Buna misal olaraq, jurnalist və siyasi məhbuslarla bağlı məsələlərin bir-birinə qarışdığını deyə bilərəm. Bundan başqa qəzetlərin məcburiyyət qarşısında qalaraq fəaliyyətini dayandırması, jurnalistlərin döyülməsi kimi problemlər də var”. Azərbaycanda siyasi məhbuslar üzrə xüsusi məruzəçinin təyin olunması təklifini dəyərləndirən A. Herkel son zamanlar bu məsələnin aktuallaşdığını bildirib: “AŞPA Hüquq Komitəsində Azərbaycanla bağlı çalışan parlamentarilərin siyasi məhbuslarla bağlı xüsusi məruzəçinin təyin olunmasına dair nə vaxt və hansı formada təklif verəcəklərini indidən deyə bilmərəm”.
Andres Herkel həmməruzəçilərin regiona növbəti səfərinin sentyabrın sonu, oktyabrın əvvəllərinə planlaşdırıldığını deyib. /APA/