Daxili siyasət

Ana səhifə

Daxili siyasət

Nazir müavini: “Azərbaycan Müdafiə Nazirliyi Silahlı Qüvvələr üzərində ictimai nəzarətin tətbiqinə tərəfdardır”

02 avqust 2007 09:10 (UTC +04:00)

“Azərbaycan torpaqlarının bir hissəsinin Ermənistan tərəfindən işğalına baxmayaraq, Azərbaycan Silahlı Qüvvələrində islahatlar aparılır”. APA-nın məlumatına görə, bu sözləri “Hərbi qulluqçuların sosial rifahının təminatına dəstək və beynəlxalq perspektivlər” mövzusunda Bakıda keçirilən beynəlxalq konfransdakı çıxışında Azərbaycan müdafiə nazirinin müavini, general-leytenant Çingiz Məmmədov deyib. Ç. Məmmədov qeyd edib ki, islahatlar Azərbaycan Silahlı Qüvvələrinin təhsil sistemində, birlik və birləşmələrində aparılır: “NATO standartlarına keçid prosesi artıq müsbət nəticələrini verir. Silahlı Qüvvələrin geyim və ərzaq təminatı yaxşılaşıb, milli kadrlar hazırlanır”. Ç. Məmmədov Müdafiə Nazirliyinin Silahlı Qüvvələr üzərində ictimai nəzarətin tətbiqinə tərəfdar olduğunu vurğulayıb: “Bir sıra Avropa ölkəsinin, o cümlədən Baltikyanı ölkələrin Silahlı Qüvvələri üzərində ictimai nəzarətlə bağlı təcrübəsi öyrənilir, ekspertlər səviyyəsində müzakirələr aparılır”. Son illər Azərbaycan Silahlı Qüvvələrində inkişaf getdiyini deyən nazir müavini bildirib ki, hərbi qulluqçuların və mülki işçilərin maaşları 2 dəfə, rütbəyə görə maaşlar 2 dəfə, hərbçilərin sığortalanması üçün ayrılan vəsait 10 dəfə, mənzil kompensasiyaları isə 4,5 dəfə artırılıb: “Hərbi qarnizonlarda yaşayış binaları tikilir, hərbi qulluqçular üçün İpoteka kreditlərinin verilməsi təmin olunub”. /APA/