Daxili siyasət

Ana səhifə

Daxili siyasət

Siyasətçilər harda və necə dincəlirlər?

07 avqust 2007 15:28 (UTC +04:00)

Yay mövsümünün gəlişi siyasi mühitdə bir durğunluq yaratsa da, bu siyasətçilərin istirahətə getməsi ilə bağlı deyil. APA-nın apardığı araşdırma nəticəsində bəlli olub ki, siyasətçilərin bir çoxu Bakıda və partiya qərargahlarındadırlar.
Yeni Azərbaycan Partiyasının icra katibinin müavini Mübariz Qurbanlı istirahət müddətinin bitdiyini deyib: “Ötən ay Nabranda istirahət etdim. Hazırda işdəyəm və bundan sonra harasa getmək fikrim yoxdur”.
Ana Vətən Partiyasının sədri Fəzail Ağamalı isə istirahətini davam etdirdiyini söyləyib: “Ötən ay 12 gün Nabranda istirahət etdim. İki gündən sonra Azərbaycanının bölgələrindən birinə gedəcəyəm. Amma məzuniyyəti daha səmərəli keçirmək mümkün deyil”.
Klassik Xalq Cəbhəsi Partiyasının (KXCP) sədri Mirmahmud Mirəlioğlu yay mövsümü gələndən yalnız bir neçə dəfə iki-üç günlük Yardımlı rayonunda dincəlib.
Azərbaycan Milli Demokrat Partiyasının sədri İsgəndər Həmidov isə Bakıda istirahət etməyə üstünlük verir: “Əvvəllər pulum olanda ölkənin gəzməli yerlərinə gedirdim. Elə ki, pulum qurtardı, özümü Kəlbəcərə çatdırırdım. İndi isə nə pulum var, nə də Kəlbəcər. Amma pulum artanda xarici ölkələrin birində istirahət etməyi düşünürəm. Hələlik isə Bakıda evimdən başqa heç yerə gedə bilmirəm”.
Azərbaycan Sosial-Demokrat Partiyasının həmsədri Araz Əlizadə isə evsizlikdən gileylənib: “Nə Bakıda, nə də rayonda evim var. Bacımın evində yaşayıram, artıq neçə ildir yayı burada keçirirəm”.
Demokratik İslahatlar Partiyasının sədri Asim Mollazadə də paytaxtı tərk etmədiyini deyib, bunun səbəbini isə Bakıda işlərinin çox olması ilə əlaqələndirib.
Açıq Cəmiyyət Partiyasının sədri Akif Şahbazov, Azərbaycan Milli İstiqlal Partiyasının lideri Etibar Məmmədov, Ümid Partiyasının sədri İqbal Ağazadə və Milli Məclisin deputatı Pənah Hüseyn də bütün yayı Bakıda olacaqlarını deyiblər.
Böyük Quruluş Partiyasının başqanı Fazil Qəzənfəroğlu isə istirahət etdiyini, hər gün Bakı ətrafındakı çimərliklərin birinə getdiyini söyləyib: “Partiyanın işi ilə bağlı Bakını uzunmüddətli tərk etmək istəmirəm. Bu baxımdan artıq neçə illərdir istirahətimi Bakıda keçirməyə üstünlük verirəm”.
Müsavat Partiyasının başqanı İsa Qəmbər, Azərbaycan Xalq Cəbhəsi Partiyasının sədri Əli Kərimli və Azərbaycan Liberal Partiyasının lideri Lalə Şövkət də istirahət etməyəcəkləri barədə qərar veriblər. Bu barədə onların köməkçiləri məlumat verib. Bütöv Azərbaycan Xalq Cəbhəsi Partiyasının sədri Qüdrət Həsənquliyev isə İngiltərədə səfərdədir. Partiyadan verilən məlumata görə, səfər istirahət xarakteri daşımır. / APA/