Daxili siyasət

Ana səhifə

Daxili siyasət

ADP prezident seçkilərində İlham Əliyevin namizədliyini dəstəkləyə bilər

21 avqust 2007 14:55 (UTC +04:00)

Müxalifət və iqtidar düşərgəsində təmsil olunan partiyalardan bəziləri 2008-ci ildə keçiriləcək prezident seçkilərinə hazırlığa artıq start verdiklərini deyiblər.
Azərbaycan Demokrat Partiyasının (ADP) sədri Sərdar Cəlaloğlu APA-ya açıqlamasında partiyanın bu ilin mayında keçirilən qurultayında prezident seçkilərində iştirak etməklə bağlı qərar qəbul etdiklərini xatırladıb. Onun sözlərinə görə, bu seçkilərdə müxalifətin vahid namizədi olacaqsa, ADP namizədi dəstəkləyə bilər, eyni zamanda seçkilərə blokla qatılmaq məsələsinin də müzakirəsi mümkündür: “Əgər iqtidar seçkinin demokratik keçirilməsinə təminat vermək üçün addımlar atsa, ADP hakimiyyətin də namizədini dəstəkləyə bilər. Yəni ADP seçkidə namizəd dəstəkləmə məsələsində milli maraqlara üstünlük verəcək”.
Ana Vətən Partiyasının (AVP) sədri Fəzail Ağamalı isə bildirib ki, partiyanın 2008-ci ilin aprel-may aylarında keçiriləcək qurultayında bu məsələyə aydınlıq gətiriləcək. O, 2003-cü ildə keçirilən prezident seçkisində İlham Əliyevin namizədliyini dəstəklədiklərini də xatırladıb: “Hesab edirəm ki, bu dəfədə partiya qurultayında İlham Əliyevin namizədliyinin dəstəklənməsi barədə qərar verəcək”.
Ədalət Partiyasının sədri İlyas İsmayılov partiyalarının prezident seçkilərində iştirak strategiyasının hələ müəyyənləşdirilmədiyini deyib: “2007-ci ilin payızında partiyanın qurultayında bu məsələ ilə bağlı qərar veriləcək”.
Ümid Partiyasının sədri İqbal Ağazadə partiyasının prezident seçkisi ilə bağlı qərar verdiyini söyləyib. İ. Ağazadə 2007-ci ilin mayında keçirilən qurultayda partiyanın seçkilərə öz namizədi ilə qatılacağı haqda qərar verdiyini qeyd edib: “Prezident seçkilərində Ümid Partiyası öz sədrinin namizədliyini irəli sürəcək”.
Böyük Quruluş Partiyasının başqanı Fazil Qəzənfəroğlu isə partiyasının Ali Məclisinin seçkiyə öz namizədi ilə qatılmaqla bağlı qərar qəbul etdiyini söyləyib: “Bu namizədin partiya üzvü və ya sədri olacağı hələ müəyyənləşməyib. Hər bir halda Böyük Quruluş Partiyası heç bir bloka, birliyə qoşulmadan, müstəqil şəkildə seçkidə iştirak edəcək”.
Bütöv Azərbaycan Xalq Cəbhəsi Partiyasının (BAXCP) sədri Qüdrət Həsənquliyevin sözlərinə görə isə partiyanın 2008-ci ilin aprelində keçiriləcək qurultayında bu məsələyə aydınlıq gələcək və qurumun prezident seçkilərində iştirakının istiqamətləri müəyyənləşdiriləcək.
Azərbaycan Xalq Cəbhəsi Partiyası (AXCP) sədrinin müavini Həsən Kərimov prezident seçkiləri ilə bağlı qərarın təmsil olunduqları “Azadlıq” blokunda müəyyənləşəcəyini deyib: “Seçki Məcəlləsində dəyişikliklər həyata keçirildikdən və komissiyalar paritet əsaslarla formalaşdıqdan sonra partiya seçkidə iştirak edə bilər. AXCP seçkidə “Azadlıq” blokunun namizədini dəstəkləyəcək”.
Açıq Cəmiyyət Partiyasının (ACP) sədri Akif Şahbazov isə partiyanın Nizamnaməsinə görə seçkidə liderlərinin-yəni Rəsul Quliyevin namizədliyini dəstəkləyəcəklərini deyib.
Azərbaycan Milli İstiqlal Partiyasının (AMİP) sədri Ayaz Rüstəmov isə seçkilərə qatılacaqları təqdirdə öz namizədlərini dəstəkləyəcəklərini bildirib.
Vəhdət Partiyasının sədri Tahir Kərimli isə partiyasının Siyasi Şuranın prezident İlham Əliyevin siyasətini dəstəkləməsi barədə rəsmi qərarı olduğunu xatırladıb: “Prezident seçkilərinə rəsmi start veriləndən sonra partiyanın qurultayı keçiriləcək. Yəqin ki, bu toplantıda İlham Əliyevin Azərbaycan prezidentliyinə namizədliyi irəli sürüləcək”. Vətəndaş və İnkişaf Partiyasının (VİP) sədri Əli Əliyev partiyasının təmsil olunduğu “Azadlıq” bloku seçkilərə qatılacağı təqdirdə Milli Birlik Hərəkatının lideri Lalə Şövkət və ya AXCP sədri Əli Kərimlinin namizədliyini dəstəkləyəcəklərini diqqətə çatdırıb.
Müsavat Partiyasının başqanı İsa Qəmbər isə APA-ya ötən həftə verdiyi müsahibəsində partiyasının 2008-ci il prezident seçkiləri ilə bağlı qərarının payızda açıqlanacağını bildirib: “İndiki mərhələdə seçkidə iştirak əhval-ruhiyyəsindəyik. Sonrakı mərhələdə hansı qərarları verəcəyimizi isə zaman göstərəcək”./APA/