Daxili siyasət

Ana səhifə

Daxili siyasət

Bakıda “Sivilizasiyaların dialoqu: partiyaların rolu” mövzusunda beynəlxalq konfrans keçirilir

27 sentyabr 2007 16:36 (UTC +04:00)

APA-nın məlumatına görə, öncə Prezidentin İcra Aparatının humanitar siyasət şöbəsinin müdiri Fatma Abdullazadə Azərbaycan prezidenti İlham Əliyevin təbrik məktubunu oxuyub.
Daha sonra YAP sədrinin müavini, partiyanın icra katibi Əli Əhmədov ölkələr arasında ictimai rəyi formalaşdıran əsas faktorlardan birinin siyasi partiyalar olduğunu bildirib. Onun sözlərinə, ayrı-ayrı ölkələr arasında siyasi dialoqun qurulması XXI əsrin vacib tələblərindən biridir.
Konfransa sədrlik edən Latviya Seyminin vitse-spikeri Karina Petersone dövlətlərarası normal münasibətlərin qurulması üçün siyasi partiyalar arasında əlaqələrin inkişaf etdirilməsinin zəruri olduğunu deyib: “Yalnız partiya demokratiyası ilə ölkədə normal münasibətlərin yaranmasına və partiyalararası dialoqun bərpasına nail olmaq mümkündür. Dialoq olmadan demokratiya mövcud deyil”.
“Sivilizasiyaların Dialoqu” Beynəlxalq Forumunun üzvü Cemal Şak dinlərarası dialoqdan danışıb. Onun fikrincə, təkallahlı dinlər arasında dialoq daha asan baş tuta bilər. Beynəlxalq İnkişaf Təşkilatının prezidenti Hans Topler qeyd edib ki, Şərq və Qərb ölkələri arasında antaqonist ziddiyyətlər “soyuq müharibə”dən sonra da mövcud olub: “Etiraf etmək lazımdır ki, bəzi hadisələr dialoqun inkişafına yer qoymur. Amma bütün problemlərin ən optimal həlli yolu siyasi dialoqdan keçir”. Rusiya Dövlət Dumasının komitə sədrinin müavini Valeri Malin sivilizasiyalararası dialoqun fərqləri aradan qaldırdığını söyləyib. Konfrans fasilədən sonra öz işini davam etdirəcək. /APA/