Daxili siyasət

Ana səhifə

Daxili siyasət

Gültəkin Hacıyeva: “AŞPA-nın oktyabr sessiyasında Azərbaycan üçün xüsusi maraq qəsb edən bir neçə məsələ müzakirə olunacaq”

28 sentyabr 2007 11:47 (UTC +04:00)

Sessiyanın ölkəmiz üçün prioritetlərini APA-ya açıqlayan Gültəkin Hacıyeva deyib ki, sessiyada Azərbaycanla birbaşa bağlı olan məsələ müzakirəyə çıxarılmayacaq: “Ancaq bu sessiyanı Azərbaycan üçün çox maraqlı və əhəmiyyətli edən məqam odur ki, bu dəfə Azərbaycan Milli Məclisinin sədri Oqtay Əsədov AŞPA-ya qonaq qismində dəvət olunub və sessiyada çıxış edəcək. Düşünürəm ki, bu, ölkəmiz üçün çox önəmli hadisədir, Azərbaycanın Avropada nüfuzunun artmasına, Azərbaycan-Avropa Şurası münasibətlərinin inkişafına və Azərbaycanın AŞPA-dakı mövqeyinin güclənməsinə dəlalət edir”.
Qeyd edək ki, sessiyanın ilk günü Gültəkin Hacıyevanın Beynəlxalq Miqrasiya Təşkilatının fəaliyyətinə həsr olunmuş məruzəsi də dinləniləcək. Buna münasibət bildirən məruzəçi deyib ki, bu fakt da Azərbaycanın AŞ-dəkı mövqeyinin, çəkisinin artmasının göstəricisidir. Deputat, həmçinin, bildirib ki, sessiyada müzakirəyə çıxarılacaq mövzular arasında Azərbaycan üçün əhəmiyyətli olan qloballaşan dünyada iqtisadi yüksəliş və sosial müdafiə mövzusu da var: “Azərbaycanın iqtisadi yüksəlişi, bu yüksəliş fonunda sosial problemlərin həlli istiqamətində həyata keçirilən layihələr, bu layihələrin dünyada gedən qloballaşma prosesindəki çəkisi baxımından bu, Azərbaycan üçün xüsusi əhəmiyyət daşıyan mövzudur”. G. Hacıyevanın sözlərinə görə, Azərbaycan üçün maraqlı məsələlərdən biri də Moldovanın öhdəlikləri ilə bağlı müzakirələrdir: “Moldova Azərbaycanın strateji tərəfdaşıdır, GUAM çərçivəsində ölkəmizlə çox sıx əməkdaşlıq edir. Sözsüz ki, demokratiya yolunda inamla irəliləyən, demokratik islahatlar istiqamətində çox ciddi uğurlara nail olan Moldovaya dəstək mövqeyindən çıxış edəcəyik”. G. Hacıyeva, həmçinin, bildirib ki, onun da üzvü olduğu AŞPA Monitorinq Komitəsinin (MK) iclasında Azərbaycanla bağlı müzakirələr gözlənilmir: “Çünki belə müzakirələr Monitorinq Komitəsinin sentyabrın 12-də Parisdə keçirilmiş iclasında informasiya mübadiləsi şəklində baş tutub. Bu dəfə isə Komitədə Azərbaycana birbaşa aidiyyəti olan uzadılmış münaqişələrlə bağlı Berlində keçiriləcək dinləmələrə hazırlıqla bağlı informasiya mübadiləsi olacaq”. Deputat xatırladıb ki, uzadılmış münaqişələrə dair dinləmələr noyabrın 5-6-də Berlində keçiriləcək. /APA/