Daxili siyasət

Ana səhifə

Daxili siyasət

AŞPA-nın Dağlıq Qarabağ üzrə Alt Komitəsinin sədri: “Noyabrın 9-da Azərbaycana səfər etməyim mümkündür”

04 oktyabr 2007 11:24 (UTC +04:00)

- Azərbaycan Milli Məclisinin spikeri Oqtay Əsədovla görüşünüzdə hansı məsələlər müzakirə olundu?
- Görüşdə konkret nəticələr əldə olunub. Mən cənab Oqtay Əsədova bildirdim ki, rəhbəri olduğum komitənin fəaliyyətinin davam etməsini istəyirəm. Bunun üçün hər iki ölkə əməkdaşlığa zəmanət verməlidir. Qeyd etdim ki, prezidentlər İlham Əliyev və Robert Köçəryana müraciət etməyi və mümkün olsa, onlarla görüşməyi planlaşdırıram. Noyabrın 9-da Bakıya səfər etməyim mümkündür. Bu, dəqiq deyil, səfərin baş tutması prezidentlərin iş qrafikindən asılıdır. Mən Oqtay Əsədova rəhbərlik etdiyim Avropa Şurası Parlament Assambleyasının Dağlıq Qarabağ üzrə Alt Komitəsinin və mədəniyyət məsələləri üzrə komitənin münaqişə zonasına səfərlərinin qısa müddətə təxirə salınmasına təəssüfləndiyimi bildirdim. Ümidvaram ki, bu məsələ qənaətbəxş səviyyədə həll olunacaq.
- Rəsmi Bakının münaqişə zonasına səfərlərin Azərbaycan ərazisindən keçməklə edilməsi mövqeyi formatının dəyişdirilməsi deməkdirmi?
- Bu, həqiqətən formatın dəyişməsi deməkdir. Mən və cənab Edvard Ohara İrəvanda görüş keçirmək barədə mədəniyyət məsələləri üzrə komitədə razılığa gəlmişdik. Lakin situasiya qəflətən dəyişdi. Mənim üçün bu, böyük bir problem deyildi, çünki görüş növbəti həftəyə keçirildi. Lakin cənab Ohara üçün bu çox böyük dəyişiklik demək idi.
- Format dəyişikliyi münaqişə zonasına səfərin həyata keçirilməsinə mane ola bilərmi?
- Hesab etmirəm ki, mənim rəhbərlik etdiyim komitə Dağlıq Qarabağ münaqişəsinin həllində vasitəçiliklə məşğul olur. Bizim əsas ideya ilk növbədə Azərbaycan və Ermənistan parlamentləri arasında əlaqə və dialoqun qurulmasına, inkişaf etməsinə, Bakıda və İrəvanda mümkün seminarların keçirilməsinə çalışmaq olub. Biz çalışmışıq ki, münasibətlər yaxşılaşsın. Onu nəzərdə tutmuram ki, bu münaqişə sonda yalnız prezidentlər İlham Əliyev və Robert Köçəryan tərəfindən həll ediləcək.
- Dünən AŞPA rəhbəri ilə görüşdə Ermənistan nümayəndə heyəti qurumun Monitorinq Komitəsinin iclasına Dağlıq Qarabağın erməni icmasının nümayəndələrinin çağırılması məsələsini qaldırıblar...
- Geniş nə isə demək istəmirəm, çünki bu barədə heç nə bilmirəm. Mən bir neçə başqa məqamlara toxunmaq istərdim. Avropa Şurasından mənə bildirdilər ki, görüşdə Dağlıq Qarabağ münaqişəsinin həlli və işğal olunmuş ərazilərdən olan qaçqınların məsələsindən başqa hər iki ölkədəki daxili siyasətdən bəhs edilib. Azərbaycanın iqtisadi inkişaf sarıdan bəxti gətirib. Ancaq bu, demokratiyaya dair məsələlərə göz yumulması ilə nəticələnməməlidir. Bizim əsas narahatlığımız siyasi məhbuslara bağlıdır, onların bəziləri yaşlı və xəstədir. Bir də jurnalistlərin azadlığı məsələsini qeyd etmək istəyirəm. Son vaxtlar Azərbaycanda yeddi jurnalist həbs olunub. Bu sözlərimi mənim zəruri qeydlərim kimi qəbul edin. /APA/