Daxili siyasət

Ana səhifə

Daxili siyasət

Oqtay Əsədov “Aqo” qrupunun və Venesiya Komissiyasının rəhbərləri ilə görüşüb

04 oktyabr 2007 13:22 (UTC +04:00)

Milli Məclisin mətbuat xidmətinin rəhbəri Akif Nəsirovun APA-nın Avropa bürosuna verdiyi məlumata görə, görüşdə Azərbaycanın Avropa Şurası, bu qurumun ayrı-ayrı strukturları, o cümlədən “Aqo” qrupu ilə əməkdaşlığı ilə bağlı məsələlər müzakirə edilib. O bildirib ki, “Aqo” qrupunun rəhbəri Azərbaycanda aparılan hüquqi islahatları yüksək qiymətləndirib: “Oqtay Əsədov da öz növbəsində yeni məhkəmələrin yaradılması haqda məlumat verdi. 2008-ci ildə keçiriləcək prezident seçkiləri və bu seçkilərə hazırlıq məsələləri də müzakirə olundu”. A. Nəsirov deyib ki, görülən işlər, həyata keçirilən islahatlar ona yönəlib ki, “Aqo” qrupu tərəfindən aparılan monitorinq dayandırılsın: “Azərbaycanda aparılan islahatlar, Avropa Şurası qarşısında götürülmüş öhdəliklərin yerinə yetirilməsi AŞ və onun ayrı-ayrı strukturları tərəfindən yüksək qiymətləndirilir. Bu da təbii ki, monitorinqlərin azalmasına və dayanmasına gətirib çıxaracaq”. Görüşdə Venesiya Komissiyasının katibi Canni Bukikkio və Milli Məclis aparatının rəhbəri Səfa Mirzəyevin də iştirak etdiyini söyləyən A. Nəsirovun sözlərinə görə, tərəflər Azərbaycanla komissiyanın əməkdaşlığına da toxunublar: “Bilirsiniz ki, hazırda Seçki Məcəlləsi ilə bağlı danışıqlar gedir. Qanun layihəsi hazırlanmaq üzrədir və ola bilsin ki, təsdiqlənmək üçün Milli Məclisə təqdim olunsun”. /APA/