Daxili siyasət

Ana səhifə

Daxili siyasət

Azərbaycanın siyasi partiyaları ABŞ Nümayəndələr Palatasının Xarici Əlaqələr Komitəsinin qərarını pisləyib

11 oktyabr 2007 15:22 (UTC +04:00)

“ABŞ Nümayəndələr Palatasının Xarici Əlaqələr Komitəsində qondarma “erməni soyqırımı” ilə bağlı qətnamənin qəbulu ABŞ-Türkiyə və ABŞ-Azərbaycan əlaqələrinə xələl gətirə bilər”. Bu sözləri APA-ya açıqlamasında Müsavat Partiyası Mərkəzi İcra Aparatının rəhbəri Arif Hacılı deyib. O bildirib ki, Müsavat Partiyası bu qətnamənin Konqresdə qəbul olunmayacağına ümid edir: “Hesab edirik ki, ABŞ-da bunu başa düşən insanlar az deyil”.
Azərbaycan Demokrat Partiyasının (ADP) sədri Sərdar Cəlaloğlu isə bu prosesin mənfi sonluqla nəticələnə biləcəyini söyləyib: “Müsəlman dünyası ilə ABŞ-ın münasibətləri isti deyil. Bu hadisə müsəlman və türk dünyası ilə ABŞ-ın əlaqələrini daha da korlaya bilər. ABŞ olmayan tarixi hadisələrlə bağlı belə mövqe nümayiş etdirməməli və məsələlərə ikili standartla yanaşmamalıdır”.
Azərbaycan Xalq Cəbhəsi Partiyasının (AXCP) sədr müavini Fuad Mustafayev də ABŞ-ın səhv addım atdığını vurğulayıb: “Bu qərar ilk növbədə ABŞ-Türkiyə münasibətlərinə, sonra isə ABŞ-ın Yaxın Şərqdəki fəaliyyətinə mənfi təsir göstərəcək. Tarixdə baş verməyən bir hadisəyə belə münasibət bildirməzlər”.
Azərbaycan Yolu Siyasi Hərəkatı (AYSH) isə faktla bağlı etiraz bəyanatı yayıb. Hərəkat baş verənləri Türkiyəyə qarşı qəsd cəhdi kimi qiymətləndirib.
Vətəndaş Həmrəyliyi Partiyası, Azəri-Türk Qadınlar Birliyi də məlum qərarı pisləyən bəyanatla çıxış edib. /APA/