Daxili siyasət

Ana səhifə

Daxili siyasət

Müxalifətdə Müsavat Partiyasının seçkilərdə iştirakla bağlı qərarına fərqli yanaşmalar var

15 oktyabr 2007 10:45 (UTC +04:00)

Müsavat Partiyasının başqanı İsa Qəmbərin 2008-ci ildə keçiriləcək prezident seçkilərində namizəd kimi iştirak etməsi ilə bağlı qərarı müxalifət düşərgəsində birmənalı qarşılanmayıb.
Azərbaycan Demokrat Partiyasının (ADP) sədri Sərdar Cəlaloğlu APA-ya açıqlamasında bu qərarı müxalifətin seçkilərə vahid namizədlə qatılması istiqamətində atılan ilk addım kimi qiymətləndirib. Onun sözlərinə görə, partiyaların hər biri öz namizədini cəmiyyətə təqdim etməli, bundan sonra vahid namizədin seçilməsi prosesi başlamalıdır. S. Cəlaloğlu müxalifətdə təmsil olunan və seçkilərdə namizədliyini irəli sürən partiya liderlərinin iştirakı ilə toplantı keçirilməsin zəruriliyini də qeyd edib: “Bu toplantıda vahid namizədin seçilmə proseduru müəyyən edilməli, günün tələblərinə cavab verən lider vahid namizəd seçilməlidir”. S. Cəlaloğlu partiyasının prezident seçkilərində iştirak edəcəyi ilə bağlı artıq qurultayın qərar qəbul etdiyini də xatırladıb.
Vətəndaş və İnkişaf Partiyasının sədri Əli Əliyev isə Müsavat Partiyasının prezident seçkisində iştirakla bağlı qərarının “Azadlıq” blokunda müzakirə edilmədiyini bildirib: “Bu, həmin partiyanın öz işidir. Lakin “Azadlıq” bloku seçkidə iştirakla bağlı mövqeyində qalır, biz hesab edirik ki, müxalifət düşərgəsində təmsil olunan partiyaların hamısı bu prinsiplə hərəkət etməlidir”.
Açıq Cəmiyyət Partiyasının (ACP) sədri Akif Şahbazov isə Müsavat Partiyasını tələskənlikdə ittiham edib: “Bizim fikrimizcə, indi ölkədə normal seçki keçirilməsi mümkün deyil, ona görə də bu kampaniyada iştirak rüsvayçı məğlubiyyətlə nəticələnə bilər. İsa Qəmbərin prezidentliyə namizədliyini irəli sürülməsi vaxtını ləngitmək daha yaxşı olardı. Özünü müxalifət hesab edən bütün qüvvələr öncə bir araya gəlib, ölkədəki siyasi mühiti təhlil edib, nəticəyə uyğun hərəkət etməlidirlər. Müsavat Partiyasının indiki qərarı məqsədə uyğun deyil”.
Ümid Partiyasının sədri İqbal Ağazadə isə APA-ya açıqlamasında prezident seçkisində iştirakla bağlı müxalifət düşərgəsində təmsil olunan partiyaların müxtəlif mövqedən çıxış etməsini normal saydığını deyib: “Partiyalar müxtəlif taktiki gedişlərlə öz siyasətlərini gerçəkləşdirirlər. Hesab edirəm ki, hər bir siyasi partiya öz uğurunu və uğursuzluğunu seçkilərə münasibətdə daha aydın görə bilir. Həmin partiya da buna uyğun qərar qəbul edir. Boykot taktikası seçənlərin özlərinin arqumenti, seçkilərə qatılanların da öz arqumentləri var. Bu qərarları təftiş etmək niyyətində deyiləm. Hesab edirəm ki, hər bir partiya öz qərarında daha doğrudur. Ümid Partiyası isə seçkilərdə iştirak etmək qərarına gəlib. Bunu da biz doğru hesab edirik. Qarşı tərəfin də qərarına hörmətlə yanaşırıq”. /APA/