Daxili siyasət

Ana səhifə

Daxili siyasət

Arif Hacılı: “Seçki kampaniyasında əsas ideyamız vahid namizədlik üzərində qurulmayacaq”

16 oktyabr 2007 13:39 (UTC +04:00)

Müsavat Partiyasının Bakı şəhər və ərazisi işğal olunmuş rayon təşkilatlarının müşavirəsi keçirilib. Partiyanın Mərkəzi İcra Aparatının rəhbəri Arif Hacılının APA-ya verdiyi məlumata görə, iclas partiya Məclisinin 2008-ci il prezident seçkilərində iştirak etməklə bağlı qərarına uyğun olaraq seçkilərə hazırlıq məqsədilə keçirilib. Müşavirədə seçkilərə hazırlıqla bağlı rayon təşkilatlarına müvafiq tapşırıqlar verilib: “Artıq seçkiyə hazırlıqla bağlı iş planı layihələri hazırlanıb və yaxın zamanlarda təsdiq olunacaq. Eyni zamanda yaxınlarda partiyada seçki qərargahı yaradılacaq və qərargah daimi fəaliyyət göstərib seçkiyə hazırlıq işlərinə rəhbərlik edəcək”. A. Hacılı partiyanın yerli təşkilatlarının zona müşavirələrinin keçiriləcəyini və strukturların möhkəmlənməsi istiqamətində iş görüləcəyini qeyd edib. İsa Qəmbərin namizədliyinin dəstəklənməsi üçün digər partiyalarla danışıqların aparılıb-aparılmayacağına gəldikdə, A. Hacılı bildirib ki, hər hansı siyasi-ictimai təşkilat partiya başqanının namizədliyini dəstəkləyəcəksə, buna müsbət yanaşacaqlar: “Amma seçki kampaniyasında əsas ideyamız vahid namizəd yox, vahid elektorat ideyası olacaq. Bütün protest elektoratının İsa Qəmbərə səs verməsinə çalışacağıq”. /APA/