Daxili siyasət

Ana səhifə

Daxili siyasət

Xəzəryanı ölkələrin prezidentləri Tehran sammitinin yekunlarına həsr olunmuş birgə mətbuat konfransı keçiriblər

16 oktyabr 2007 17:05 (UTC +04:00)

O, sammitdə sahilyanı ölkələrin XİN başçılarının 6 aydan bir görüşəcəkləri barədə razılığa gəlindiyini söyləyib. İran prezidenti bildirib ki, Xəzəryanı dövlət başçılarının növbəti görüşü 2008-ci ilin oktyabrında Bakıda keçiriləcək.
“Tehran sammitində Xəzər dənizinin statusu, iqtisadi məsələlər, regionda sülh və təhlükəsizlik, ekologiya məsələləri və bütün sahilyanı ölkələrin əməkdaşlığı haqqında müzakirələr aparılıb”. Bunu isə prezident İlham Əliyev deyib. O, Tehran sammitinin dostluq mühiti və qarşılıqlı anlaşma şəraitində keçdiyini bildirib: “Bu səbəbdən sammitin nəticələri ümidverici hesab olunmalıdır. Bu onu göstərir ki, Xəzərin hüquqi statusu məsələsi müvəffəqiyyətlə həll olunacaq. Sammitin bəyannaməsi bu tədbirin ən uğurlu nailiyyətidir. Bəyannamə sahilyanı ölkələrin bir sıra məsələlərə dair mövqelərini özündə əks etdirir”. Sammitdə “Şimal-Cənub” dəhlizi məsələsinin də müzakirə olunduğunu deyən prezident Azərbaycanın bu nəqliyyat dəhlizinin reallaşmasında maraqlı olduğunu bildirib.
Qazaxıstan prezidenti Nursultan Nazarbayev də müzakirələri uğurlu hesab edib: “Bizim məsələ ilə bağlı 1994-cü ildə Moskvadakı görüşümüz, həmçinin 2001-ci ildə Aşqabadda keçirilən sammit nəticəsiz başa çatmışdı. Bu dəfə isə biz bəyannamə imzaladıq, bu isə bizim razılaşmaya yaxınlaşdığımızı göstərir. Elan edirəm ki, bizim aramızda həll olunmayan məsələ yoxdur. Azərbaycanda keçiriləcək növbəti sammitdə statusla bağlı sənəd hazırlanacaq”. O, sammitin yekunlarından razı olduğunu da diqqətə çatdırıb: “Xəzərin sülh və əmin-amanlıq hövzəsi olmasında maraqlıyıq”.
Rusiya prezidenti Vladimir Putin də sammitin əhəmiyyətindən danışıb: “Biz razılaşmışıq ki, nəticə əldə olunana qədər müzakirələri davam etdirək. Əməldə bir çox məsələlərdə razılığa gəlmişik. Hesab edirik ki, Xəzərdə hakimiyyət yalnız sahilyanı ölkələrə məxsusdur. Bu xüsusilə də yeraltı resurslarla bağlıdır. İqtisadi Əməkdaşlıq Təşkilatı ilə bağlı razılaşmaya əsasən Moskvada gələn il konfrans keçirməyi planlaşdırmışıq. Xüsusi qeyd etmək istəyirəm ki, bütün tərəflər müzakirəyə çıxarılan məsələlərə müsbət yanaşdılar. Proses bizi razılaşmaya doğru aparır”.
Türkmənistan prezidenti Qurbanqulu Berdimuxammedov Xəzər hövzəsini sülh və dostluq bölgəsi adlandırıb: “Bu sammit mövqelərin yaxınlaşdığını göstərdi. Əlbəttə, bəzi məsələlərin hələ də müzakirəsinə ehtiyac var və bəyannamənin imzalanması problemlərin həlli istiqamətində atılan addımdır. İkinci mühüm məsələ Qazaxıstan-Türkmənistan-İran dəmiryolu xətti ilə bağlı qətnamədir ki, bu üç ölkə arasında həm iqtisadi, həm də digər məsələlərdə inteqrasiyaya gətirib çıxaracaq. Bu yolla biz İran körfəzinə çıxış əldə edirik”. /APA/