Daxili siyasət

Ana səhifə

Daxili siyasət

“Uydurma “erməni soyqırımı”na təsir vasitəsi” mövzusunda dəyirmi masa keçirilib

18 oktyabr 2007 14:40 (UTC +04:00)

Azəri-Türk Qadınlar Birliyi “Uydurma “erməni soyqırımı”na təsir vasitəsi” mövzusunda dəyirmi masa keçirib. APA-nın məlumatına görə, birliyin sədri Tənzilə Rüstəmxanlı bildirib ki, ABŞ Nümayəndələr Palatası Xarici Əlaqələr Komitəsinin qondarma “erməni soyqırımı”nı tanıyan qətnamənin qəbulu, Qarabağ məsələsində bu ölkənin ədalətli mövqe tutmasına şübhə yaradır. Onun sözlərinə görə, Azərbaycan parlamenti bu barədə öz etirazını rəsmi şəkildə ABŞ konqresinə bildirməlidir. DAK sədrinin I müavini Sabir Rüstəmxanlı isə deyib ki, məlum qərar türk-müsəlman dünyasına yönəlib. O, Şərqi Anadolu, İrəvan, Zəngəzur, Göycə, Dərələyəz, Qarabağ, Şamaxı, Quba, Salyan, Bakı və digər ərazilərdə ermənilərin keçən əsrin əvvəllərində törətdikləri qətliamlara da diqqəti yönəldib: “ABŞ və Qərb dövlətləri qondarma “erməni soyqırımı” adı altında türk dünyasına təzyiq edir”. Milli Məclisin deputatı Fəzail İbrahimli isə “erməni soyqırımı”nı tanıyan qətnamənin qəbulunun təəccüblü olmadığını deyib: “Bu, uzun illərdən bəri başlanan prosesin bir mərhələsidir və İslam dünyasına qarşı aparılan müharibədir”. Türkiyənin Azərbaycandakı səfirliyinin nümayəndəsi Nur Alkış Türkiyə ilə Azərbaycanın eyni mövqedən çıxış etməsinin zəruriliyini vurğulayıb. Toplantıda digər çıxış edənlər də ABŞ-ın Türkiyə ilə bağlı siyasətini pisləyiblər. /APA/