Daxili siyasət

Ana səhifə

Daxili siyasət

Yevgeniya Jivkova: “Dağlıq Qarabağ münaqişəsi haqda məlumatlı olmasam da, Azərbaycan ərazilərinin işğal olunduğunu bilirəm”

12 noyabr 2007 11:27 (UTC +04:00)

- Azərbaycanı kifayət qədər tanıyırsınızmı və ölkənin əsas problemi Dağlıq Qarabağ münaqişəsi haqda məlumatlısınızmı?
- Mən hal-hazırda Azərbaycan haqqında o qədər də məlumatlı deyiləm və bu baxımdan sizi məyus etmək istəməzdim. Yeni vəzifəmin icrasına məsuliyyətlə başlayıram və sürətlə inkişaf edən, müasirləşən Azərbaycanla çox fəal çalışmaq arzusundayam. Dağlıq Qarabağ problemi barədə yetərli səviyyədə məlumatlı olduğumu söyləməyim çox ambisioz çıxar, amma mən AŞPA-nın bu barədə qəbul etdiyi qətnaməni əsas tutaraq deyə bilərəm ki, Azərbaycan ərazilərinin müəyyən hissəsi hələ də işğal altındadır. Bu münaqişə nəticəsində 4 mindən çox insan itkin düşmüş sayılır, azərbaycanlı məcburi köçkünlərin sayı isə 760 min nəfərdir. Mən Vyanada ATƏT çərçivəsində keçirilən və hər iki tərəfin tez-tez mövqe bildirdiyi müzakirələrin yazılı qeydlərini də öyrənmək niyyətindəyəm. İnanıram ki, Azərbaycanla Ermənistan arasında davam edən yüksək səviyyəli dialoq nəticə verəcək. Eyni zamanda AŞPA-nın mövqeyini bölüşərək hesab edirəm ki, Azərbaycan hökuməti əhalini hazırda müzakirə olunan məsələlərin qəbulu üçün hazırlamalı, Azərbaycan və Ermənistanın vətəndaş cəmiyyətləri arasında əlaqələr inkişaf etdirilməlidir.
- Azərbaycanın Avropa Şurası qarşısındakı öhdəlikləri və onların yerinə yetirilməsinin vəziyyəti ilə tanışsınızmı?
- Azərbaycanın Avropa Şurası qarşısındakı öhdəlikləri ilə bağlı mənzərə budur ki, bir tərəfdən AŞPA Azərbaycanın bir sıra sahələr üzrə əldə etdiyi nailiyyətlərdən xəbərdardır. Bunun ən bariz nümunəsi Seçki Məcəlləsinə dəyişikliklər edilməsi və bu yaxınlarda insan haqlarının müdafiəsi üzrə Milli Fəaliyyət Planının qəbuludur. Ancaq digər tərəfdən, assambleya hakim çoxluqla müxalifət arasında dialoq qurulmamasından çox narahatdır.
- Digər həmməruzəçi - Andres Herkellə əlaqə saxlamısızmı? Onun Azərbaycanda siyasi məhbuslar üzrə xüsusi məruzəçi təyin olunmasının zəruriliyi barədə mövqeyini bölüşürsünüzmü?
- Mən sosialist qrupundan Azərbaycan üzrə həmməruzəçi təyin olunarkən öz çıxışımda bildirmişdim ki, həmkarım Avropa Xalq Partiyasının AŞPA-dakı qrupunun üzvü, eston parlamentar Andres Herkellə çox yaxından əməkdaşlıq edəcəyəm. O, Azərbaycanda müəyyən iş təcrübəsinə malikdir və bu təcrübə Monitorinq Komitəsi tərəfindən qiymətləndirilir. Siyasi məhbuslar üzrə xüsusi məruzəçinin təyin olunmasına gəldikdə isə, bu suala cavab verməzdən əvvəl Herkellə bu mövzuda söhbət etmək istəyirəm. Bu, çox mürəkkəb məsələdir və hesab edirəm ki, təkcə Herkellə yox, başqa şəxslərlə də məsləhətləşmək lazımdır.
- Azərbaycanda mətbuatla bağlı yaranmış duruma münasibətiniz necədir?
- AŞPA-nın Azərbaycanda media ilə bağlı narahatlığı plüralizm və söz azadlığı məsələləri ilə əlaqədardır və bu, Monitorinq Komitəsinin bütün hesabatlarında əks olunub. Əlbəttə, bu disputda kimin haqlı, kimin haqsız olduğunu müəyyənləşdirmək mənim işim deyil. Ancaq mən bu məsələ ilə bağlı situasiyanın inkişafını diqqətlə izləyəcəyəm. Azad və məsuliyyətli mətbuat Avropa demokratiyasının təməl daşlarından biridir.
- Azərbaycanın məsələsinin AŞPA-nın yanvar sessiyasında müzakirə ediləcəyini gözləmək olarmı?
- Bunu assambleyanın bürosu həll edəcək. Ancaq hələlik məndə bu barədə məlumat yoxdur.
- Bolqarıstan parlamentinin deputatı kimi Azərbaycan-Bolqarıstan əlaqələrinin səviyyəsini necə qiymətləndirirsiniz? Baş nazir Sergey Stanişevin Bakıya səfərindən nə gözləyirsiniz?
- Azərbaycan və Bolqarıstan parlamentləri arasında əməkdaşlıq siyasi və digər problemlərin mövcud olmadığı ənənəvi yaxşı münasibətlər bazasında inkişaf edir. Bizim xarici siyasətlə bağlı prioritetlərimiz eynidir. Hər iki ölkənin siyasi və iqtisadi sabitliyi ikitərəfli əlaqələrin sonrakı inkişafı üçün yeni perspektivlər açır. Tərəflərin siyasi, iqtisadi, sosial və qeyri-hökumət sektorlarında son illər əldə etdikləri əməkdaşlığımız üçün yaxşı start sayıla bilər, amma bu, mövcud potensiala uyğun deyil xüsusən də avrointeqrasiya sahəsində. Bolqarıstan Avropa Qonşuluq Siyasəti məsələsində Azərbaycana dəstək verə bilər. /APA/