Daxili siyasət

Ana səhifə

Daxili siyasət

ABŞ-da Ermənistan Fondunun təşkil etdiyi “Teleton” Los Anceles-İrəvan telekörpüsü layihəsində ermənilərin növbəti təxribatının üstü açılıb - YENİLƏNİB

13 noyabr 2007 15:17 (UTC +04:00)

ABŞ-da Şükranlıq Günü (Thanksgiving Day) ilə eyni vaxtda keçiriləcək telekörpü barədə ermənilər yazıblar ki, bu layihə çərçivəsində toplanacaq vəsait Ermənistanın Tauş rayonunun və qondarma “Dağlıq Qarabağ Respublikası”nın “Martuni” rayonunun inkişafı proqramına xərclənəcək. Ən maraqlısı budur ki, ermənilər guya Ermənistan və qondarma “Dağlıq Qarabağ Respublikasın”a xərclənəcək bu vəsaitin BMT-nin İnkişaf Proqramı (UNDP), ABŞ Hökumətinin Millenium Challenge proqramı və Dünya Bankı ilə birgə həyata keçirildiyini bildiriblər. Bu telekörpü Amerikanın PBS İctimai kanalı, Hollivudun KCET və Los-Ancelesin KSCE, eyni zamanda Ermənistanın H-1 və Armanian TV vasitəsilə yayımlanacaq. Telekörpüdə Ermənistanın xarici işlər naziri Vardan Oskanyan və qondarma “Dağlıq Qarabağ Respublikası”nın “prezidenti” Bako Saakyanın da çıxış etməsi gözlənilir. Ermənilər “xeyriyyə marafonu” adı ilə keçirdikləri separatçı tədbirlərinə yəhudi və digər icmaların nümayəndələrini də qatmağa çalışırlar.
Dünya Bankından isə APA-nın ABŞ bürosuna ermənilərin yaydığı məlumatın yalan olduğunu deyiblər. Bankın əməkdaşı bildirib ki, Dünya Bankı işğal olunmuş Dağlıq Qarabağda heç bir layihə həyata keçirmir: “ Biz Azərbaycanın ərazi bütövlüyünü tanıyırıq. İkincisi, əgər torpaqlarınız azad olunandan sonra Dünya Bankı həm ərazidə hər hansı bərpa işləri aparmaq qərarına gəlsə, bunun üçün mütləq rəsmi Bakıdan icazə istəyəcək”. Dünya Bankından məsələ tam araşdırıldıqdan sonra rəsmi açıqlama da yayılacağını bildiriblər. Eyni sözləri Millenium Challenge proqramının və BMT İnkişaf Proqramının rəsmiləri də bəyan ediblər.
“Biz bilirik ki, ABŞ Ermənistanın həyata keçirdiyi qanunsuz hərəkətləri dəstəkləmir və Azərbaycanın ərazi bütövlüyünü tanıyır. Mən bu layihəyə Dünya Bankı, BMT-nin İnkişaf Proqramı və ABŞ-ın Millenium Challenge proqramı tərəfindən dəstək verdiyinə inanmıram”. Bunu isə Xarici İşlər Nazirliyinin mətbuat xidmətinin rəhbəri Xəzər İbrahim deyib. Layihə çərçivəsində əldə olunacaq vəsaitin həm də Dağlıq Qarabağın inkişafına yönəlməsinin heç də pis niyyət olmadığını deyən X. İbrahim “ermənilərin özləri tərəfindən dağıtdıqları infrastrukturu bərpa etmək niyyətləri heç də pis deyil. Hazırda işğal altında olan Dağlıq Qarabağ mütləq azad olunacaq və oraya qayıdacaq əhali həmin infrastrukturdan istifadə edəcək” deyib.
Millət vəkili Qənirə Paşayeva isə həmin tele-marafonun Amerika telekanalları ilə yayımlanmasını və bu telekörpüdə separatçıların liderinin qondarma “Dağlıq Qarabağ Respublikası”nın “prezidenti” kimi təqdim olunmasının onun Amerika cəmiyyətində legitimləşdirilməsi məqsədi daşıdığını bildirib: “ABŞ Azərbaycanın ərazi bütövlüyünü tanıyan və münaqişənin nizamlanması prosesində iştirak edən ATƏT-in Minsk qrupunun həmsədr dövlətidir. Bu dövlətin televiziyaları da “xeyriyyə marafonu” adı altında ermənilərin separatçı lideri cəmiyyətə təqdim etmələrinə şərait yaratmamalıdırlar. Onlar bunu etməklə vətəndaşı olduqları dövlətin prinsiplərinə hörmətsiz yanaşdıqlarını göstərəcəklər”.
Millət vəkili “xeyriyyə marafonun”dan yığılan vəsaitin Ermənistanın Tauş rayonu ilə yanaşı qondarma “Dağlıq Qarabağ Respublikası”nın “Martuni rayonuna” xərclənəcəyi ilə bağlı tezisi işlətməklə separatçı qurumu leqallaşdırmağa çalışdıqlarını da deyib.
Q. Paşayeva dost icmaların da bu tədbirlərə qatılmamasına nail olmağın vacibliyini söyləyib. O, Azərbaycanın dövlət qurumlarını, diaspor təşkilatlarını, xaricdə təhsil alan fəal tələbələri bütün diaspor təşkilatlarını hadisənin mahiyyəti barədə məlumatlandırmağa və etiraz etməyə çağırıb: “Biz dost diaspor təşkilatlarını hadisənin mahiyyəti, ermənilərin çirkli niyyətləri barədə məlumatlandırmalıyıq. Bildirməliyik ki, bu tədbirdə hər hansı formada iştirak edəcək diaspor təşkilatı Azərbaycanın ərazi bütövlüyünə hörmətsiz yanaşmış olacaq. Eyni zamanda bu tele marafonu yayımlayacaq ABŞ televiziyalarına etirazlar göndərməliyik. Mən artıq bir neçə diaspor təşkilatına bu hadisənin mahiyyəti barədə yazmışam ”.
Q. Paşayeva ermənilərin adından istifadə etdikləri beynəlxalq təşkilatlarından da nüfuzuna zərbə vurduqlarını, buna görə də həmin təşkilatların rəsmi açıqlama ilə təkzib vermələrinin mütləqliyini vurğulayıb. /APA/