Daxili siyasət

Ana səhifə

Daxili siyasət

ALP Siyasi Şurasının növbəti iclası keçirilib

22 noyabr 2007 12:04 (UTC +04:00)

Azərbaycan Liberal Partiyasının (ALP) Siyasi Şurasının növbəti iclası keçirilib. Partiyanın mətbuat xidmətindən APA-ya daxil olan məlumata görə, İcraiyyə Komitəsinin sədri Elman Məmmədzadənin rəhbərliyi ilə keçirilən iclasda ALP-nin növbəti qurultayının gündəliyinə təqdim olunacaq məsələlər müzakirə edilib. Partiyanın sədr əvəzi Əvəz Temirxan “ALP Siyasi Şurasının fəaliyyəti barədə hesabat”, ALP sədrinin müavini Elxan Abbasov “ALP Nizamnaməsinə əlavələr və dəyişikliklər edilməsinə dair təkliflər barədə” məruzə ediblər. Müzakirələrdə partiyanın 9 daimi komissiyasının, 9 departamentin və 11 ərazi şöbə rəhbərləri partiyanın fəaliyyəti ilə bağlı öz fikirlərini bildiriblər. İclasda vətəndaşların sərbəst toplaşmaq azadlığının qadağan edilməsi, söz azadlığına basqılar, “Azadlıq” qəzetinin baş redaktoru Qənimət Zahidin və digər 8 jurnalistin həbsi müzakirə edilib. Siyasi Şura Seçki Məcəlləsinə və “Siyasi partiyalar haqqında” qanuna əlavə və dəyişiklərin edilmədiyini nəzərə alaraq, ALP-nin növbəti qurultayının təxirə salınması barədə qərar qəbul edib. Qurultayın 2008-ci ildə prezident seçkiləri dövründə keçirilməsi barədə qərar qəbul olunub. Qeyd edək ki, partiya növbəti qurultayını noyabrın sonlarında keçirməyi nəzərdə tuturdu. /APA/