Daxili siyasət

Ana səhifə

Daxili siyasət

Sərdar Cəlaloğlu: “Azadlıq” blokundakı partiyalar özlərindən başqa heç kəsi bəyənmirlər”

27 noyabr 2007 10:25 (UTC +04:00)

Müsavat, ADP, ALP və AXCP liderlərinin yaxın gələcəkdə birgə toplantısı nəzərdə tutulmur. ADP sədri Sərdar Cəlaloğlu APA-ya açıqlamasında bundan əvvəl də bu partiyaların xüsusi toplantı keçirmədiyini deyib: “Yalnız Beynəlxalq Seçki Sistemləri Fondunun təşkil etdiyi müzakirələrlə bağlı birgə bəyanatla çıxış etmişik. Bu addımı bəzi mətbuat orqanları yanlış olaraq yeni ittifaq kimi qələmə veriblər”. S. Cəlaloğlu “Azadlıq” blokunda olan partiyalarla birgə əməkdaşlığın nəzərdə tutulmadığını da vurğulayıb: “Bu blokda olan partiyalarla əməkdaşlıq üçün bir dəfə cəhd elədim. Başa düşdüm ki, o partiyalar digər hər hansı qüvvə ilə səmimi, ciddi əməkdaşlığa meylli deyillər. Onlar özlərini təcrid yolunu tutublar. Ona görə düşünürəm ki, bizim tərəfimizdən əməkdaşlıqla bağlı xüsusi təklifə, cəhdə ehtiyac yoxdur”. “Azadlıq” blokundakı qüvvələrin ADP və Müsavat Partiyasını əsl müxalifət hesab etməməsinə gəldikdə, S. Cəlaloğlu bildirib ki, kimin nə uğrunda mübarizə apardığını tarix göstərəcək: “Ona görə də bizi nə hesab etmələri onların öz işidir. Necə olur ki, hansısa sənədə qol çəkəndə müxalifət oluruq, əməkdaşlıq etmək məsələsi gələndə yox? Bunlar qeyri-səmimi davranışların nəticəsidir. Onlar təkcə bizimlə yox, ümumilikdə digər siyasi qüvvələrlə əməkdaşlıqda da maraqlı deyillər və heç kəsi bəyənmirlər”. /APA/