Daxili siyasət

Ana səhifə

Daxili siyasət

Bakıda Azərbaycan-NATO Beynəlxalq Məktəbinin qış sessiyası öz işinə başlayıb

10 dekabr 2007 09:23 (UTC +04:00)

APA-nın xəbərinə görə, tədbiri açıq elan edən Azərbaycan xarici işlər nazirinin müavini Araz Əzimov bildirib ki, Azərbaycan Avroatlantik strukturlarla sıx əməkdaşlıq edir: “Dekabrın 15-nə qədər davam edəcək sessiya zamanı təhlükəsizlik çağırışları və konfliktlərin aradan qaldırılması yolları müzakirə olunacaq”.
Türkiyənin Azərbaycandakı səfiri Hüseyn Avni Karslıoğlu Azərbaycanın böyük perspektivlərə malik ölkə olduğunu vurğulayıb: “Türkiyə ilə Azərbaycan iki qardaş ölkədir. Ona görə də Qarabağ bizim üçün çox vacib məsələdir. Xüsusən də təhlükəsizlik baxımından”.
NATO-nun Cənubi Qafqaz üzrə əlaqələndirici zabiti Zbiqnev Rybacki Azərbaycanın Avroatlantik strukturlara inteqrasiyasını dəstəklədiklərini söyləyib: “Azərbaycan NATO üçün bir çox sahələrdə mühüm əhəmiyyət kəsb edir. Xüsusən regional təhlükəsizlik və terrorla mübarizə sahəsində Azərbaycanın rolu danılmazdır”.
Qeyd edək ki, tədbir “Avro-Atlantik məkanda sülh əməliyyatları: problemlər və perspektivlər” mövzusuna həsr olunub. Sessiyada NATO-nun Tərəfdaşlıq proqramları və Qafqaz siyasəti, sülh əməliyyatlarının prinsipləri və hüquqi aspektləri, NATO-nun sülh əməliyyatları, sülh və müharibə anlayışlarına konseptual yanaşmalar, post-konflikt cəmiyyətlərində təhlükəsizlik sektorunun islahatları, sülh əməliyyatlarına milli yanaşmalar, Media və mülki təşkilatların sülh yaratma prosesində rolu, mülki-hərbi əlaqələr, sülh əməliyyatlarının problem və perspektivləri haqqında müzakirələr aparılacaq. NİSA-nın Qış Sessiyası Azərbaycan Respublikası Xarici İşlər Nazirliyi və NATO-nun İctimai Diplomatiya İdarəsinin ekspert və maliyyə yardımı ilə keçirilir. “NATO İnternational School of Azerbaijan”ın məqsədi Avro-Atlantika məkanı və onun hüdudlarından kənarda yerləşən NATO üzv və tərəfdaş dövlətlərin gənc elmi tədqiqatçıları, müstəqil ekspertləri və habelə, hərbi və mülki nümayəndələri arasında əməkdaşlıq şəbəkəsinin qurulması, “təhlükəsizliyin bölünməzliyi” prinsipindən çıxış edərək, çağdaş təhdidlərin müzakirəsi və birgə səylərlə, onların həlli yollarının araşdırılmasından ibarətdir. /APA/