Daxili siyasət

Ana səhifə

Daxili siyasət

Kristian Ştrohal: “Azərbaycanda azad seçkilərin keçirilməsi təkcə hakimiyyətdən asılı deyil”

11 dekabr 2007 09:13 (UTC +04:00)

- Azərbaycanda gedən prosesləri 10 ilə yaxındır, izləyən şəxs kimi, indiki durumu necə dəyərləndirirsiniz?
- Seçkilər yaxınlaşdıqca, bizim nümayəndələr ölkənizə mütəmadi səfərlər edəcək və baş verən prosesləri daha diqqətlə izləyəcəklər. Ümidvarıq ki, seçkilərə qədər vəziyyət daha da yaxşılaşacaq. Bu məsələdə Azərbaycana yardım edə biləcəyimizə əminik. Biz sərbəst toplaşmaq azadlığı ilə bağlı müəyyən tövsiyələr verəcəyik, çünki hesab edirik ki, insanlara istədikləri yerdə toplaşmağa icazə vermək lazımdır. Həbs olunmuş jurnalistlərə gəlincə, bu məsələdə həmkarım Mikloş Haraşti ilə tam razıyam. Bilirəm ki, o, Azərbaycanda medianın mövcud durumundan ciddi narahatdır. Ümidvaram ki, bu sahədə pozitiv dəyişikliklər olacaq.
- Azərbaycanda prezident seçkilərinin azad və ədalətli keçiriləcəyinə inanırsınızmı?
- Hər bir ölkənin nəinki azad və müstəqil seçkilər imkanı olmalıdır, bu cür seçkilərin keçirilməsi hər bir ölkənin öhdəliyinə çevrilməlidir. Azad seçkilərin keçirilməsi Azərbaycanın üzərinə götürdüyü öhdəlikdir. Ölkəniz nəinki belə seçkilər keçirmək imkanına malikdir, həm də bunun üçün bütün şərait var. Deməli, azad və demokratik seçkilər keçirmək üçün təkcə istək qalır.
- Azərbaycanın Seçki Məcəlləsinə təklif olunan dəyişikliklərə münasibətiniz necədir?
- Bu məsələdə biz Avropa Şurasını tam dəstəkləyirik. Hesab edirik ki, seçkilər ərəfəsində Seçki Məcəlləsinə dəyişikliklər edilməsi o qədər də düz olmazdı, bundan qaçmaq lazımdır. Dəyişiklikləri o zaman etmək lazımdır ki, hakimiyyət, müxalifət, qeyri-hökumət təşkilatlarının nümayəndələri bu yeniliklərə adaptasiya ola bilsin, alışsın. Buna görə də Azərbaycanın Seçki Məcəlləsinə dəyişikliklərin qısa müddət ərzində edilməsinin tərəfdaram. Bu halda hamı yeni dəyişikliklərə adaptasiya olunmaq imkanı qazanacaq.
- Bəzi siyasi dairələr prezident seçkiləri beynəlxalq standartlara uyğun keçirilməyəcəyi təqdirdə, ATƏT-in Azərbaycana qarşı sanksiyalar tətbiq etməsini istəyir...
- Sanksiya tətbiqi ATƏT-in qaydalarına uyğun deyil. Biz ölkələrə sanksiya tətbiq etmirik, bu bizim təşkilatın siyasi mədəniyyətinə uyğun mexanizm deyil. Biz yalnız tövsiyələr verir, daha sonra bu tövsiyələrə necə riayət olunduğunu izləyirik. Ümid edir və inanırıq ki, Azərbaycan azad seçkilər keçirə bilər. Özü də bu, təkcə hakimiyyətdən asılı məsələ deyil, cəmiyyət də azad seçkilərin keçirilməsinə çalışmalıdır.
- ATƏT bu ay Özbəkistanda keçiriləcək seçkiləri izləməyə gedəcəkmi?
- Biz Özbəkistana gedəcəyik, dəvət olunduğumuz istənilən ölkədə seçkiləri izləyirik. Seçkilərdə hakimiyyət, yaxud müxalifət nümayəndəsinin qalib gəlməsi bizi maraqlandırmır. Bizi narahat edən məqam seçki prosesinin necə keçməsi, beynəlxalq standartlara uyğun olub-olmamasıdır.
- Yaxın vaxtlarda Gürcüstan və Ermənistanda da seçkilər keçiriləcək. Sizcə, bu seçkilərin beynəlxalq standartlara uyğun keçirilməsi ehtimalı nə qədərdir?
- Bu ölkələrdə seçkilər gələn il keçiriləcək, buna qədər isə bizim görə biləcəyimiz çox iş var. Gürcüstan və Ermənistanda bir qədər fərqli situasiya hökm sürür. Müşahidəçilərimiz bu seçkiləri izləyəcəklər və ümid edirik ki, Gürcüstan və Ermənistanda seçkilər demokratik standartlara uyğun olacaq. /APA/