Daxili siyasət

Ana səhifə

Daxili siyasət

Avropa Şurasının insan hüquqları üzrə komissarı Azərbaycanda insan hüquqlarının vəziyyətinə dair hesabatını açıqlayıb

20 fevral 2008 16:53 (UTC +04:00)

Tomas Hammrberq həmçinin hökumətin insan hüquqlarının müdafiəsinə dair Milli Fəaliyyət Planı qəbul etməsini və üzərinə öhdəliklər götürməsini alqışlayıb: “Amma bu sahədə hələ də çatışmazlıqlar mövcuddur. Xüsusilə, məhkəmələrin işi, polisin davranışı, azadlıqdan ömürlük məhrum edilmiş şəxslərin hüquqlarının qorunması məsələsində bəzi addımlar atılmasına ehtiyac var”. O, həmçinin, söz azadlığına hörmətlə yanaşılmasını tövsiyə edib. Komissar hökuməti məhkəmə-hüquq sistemində islahatları başa çatdırmağa, məhkəmələrin işinin effektivliyini artırmağa və ədliyyə sistemini Avropa standartlarına uyğunlaşdırmağa çağırıb: “Arzu edirik ki, hökumət şübhəli motivlərlə əsaslandırılmış cinayət işləri və qeyri-proporsional hökmlər çıxarılması barədə bəyanatlara diqqəti artırsın”. Hesabatda həmçinin təhqiqat dövründə şübhəli şəxs qismində saxlanan vətəndaşlara işgəncə verilməsi ilə bağlı məlumatlardan, müxalifət nümayəndələrinin və media təmsilçilərinin həbsindən narahatlıq da ifadə edilib: “Mən bu problemlərin aradan qaldırılması üçün polis zabitlərinə insan hüquqlarına dair müvafiq treninqlər keçirilməsini, cəzasızlıqdan yayınmaq üçün səlahiyyətlərdən sui-istifadə hallarına dair təhqiqatlar aparılmasını tövsiyə edərdim”.
Hesabatda informasiya əldə edilməsi, həmçinin bir neçə jurnalistin həbsi ilə bağlı məsələlərdən narahatlıq da bildirilib. Prezidentin əfv fərmanı ilə bir neçə jurnalistin azadlığa buraxılmasını alqışlayan komissar Cinayət Məcəlləsindən böhtana görə cinayət məsuliyyətini nəzərdə tutan maddənin çıxarılmasını zəruri sayıb. Hesabatın bir hissəsi Azərbaycanda traffikinq probleminə həsr olunub: “Bu, Azərbaycan mühiti üçün çox təhlükəli fenomendir, insan alveri qurbanlarına çox az yardım edilir. Hakimiyyət orqanlarına ailə zorakılığı, ev şəraitində törədilən zorakılıq hallarına qarşı mübarizəni gücləndirməyi tövsiyə edirəm”. Azərbaycanda uşaq hüquqlarının qorunması məsələsinə toxunan Tomas Hammarberq yetkinlik yaşına çatmayanların müdafiəsinin gücləndirilməsinə çağırıb. Hesabatda həmçinin ölkədəki milli azlıqların hüquqlarının qorunması sahəsində vəziyyətə də toxunulub. Komissar həmçinin “Alternativ xidmət haqqında” qanunun qəbulunun vacibliyini qeyd edib. Hesabatın sonunda Dağlıq Qarabağ münaqişəsinin nəticələrinə yer ayıran Tomas Hammarberq münaqişə nəticəsində yurd-yuvalarından didərgin düşmüş məcburi köçkünlərin müdafiəsinin gücləndirilməsinin vacibliyini qeyd edib. O, xüsusilə, münaqişə nəticəsində itkin düşmüş şəxslərin taleyinin araşdırılması üçün səylərin artırılmasına və bu sahədə Beynəlxalq Qırmızı Xaç Komitəsi ilə daha sıx əməkdaşlığa çağırıb.