Daxili siyasət

Ana səhifə

Daxili siyasət

ABŞ Konqresinin üzvləri Xocalı soyqırımının ildönümü ilə bağlı spiker Nensi Pellosiyə müraciət ediblər

27 fevral 2008 07:45 (UTC +04:00)

APA-nın ABŞ bürosunun məlumatına görə, Solomon Ortiz spiker Pellosiyə yolladığı bəyanatda qeyd edib ki, 1992-ci il fevralın 25-dən 26-na keçən gecə Xocalı şəhəri erməni separatçılarının hücumuna məruz qalıb: “Nəticədə 7000 əhalisi olan Xocalı şəhəri tamamilə məhv edilib, 613 dinc sakin, o cümlədən 106 qadın, 83 uşaq qətlə yetirilib. Uşaqlardan 56 nəfərinin xüsusi qəddarlıqla qətlə yetirilməsi barədə məlumatlar var. Bundan başqa, 1275 Xocalı sakini girov götürülüb, 150 insan itkin düşüb, 487 nəfər, o cümlədən 76 gənc əlil olub, 8 ailə tamamilə məhv edilib, 25 uşaq hər iki valideynini, 130 uşaq isə bir valideynini itirib”.
Konqresmen bəyanatında qeyd edib ki, ermənilərin Xocalıda həyata keçirdiyi soyqırımı faktı ilk qeydə alınan fakt deyil: “Bu hadisə Dağlıq Qarabağ uğrunda gedən müharibədə separatçılar tərəfindən bütün bölgədə tətbiq edilən eyni vəhşiliyin bir epizodudur”. ABŞ Konqresinin Azərbaycanla bağlı İşçi Qrupunun həmsədri Salomon Ortiz bildirib ki, Xocalı soyqırımına görə indiyədək heç kim məsuliyyətə cəlb olunmayıb və Dağlıq Qarabağ münaqişəsi həll olunmamış qalır. Cənab Ortiz bu il yanvarın 21-də xarici işlər naziri Elmar Məmmədyarovun “Wall Street Journal”da dərc etdiyi məqalədən sitat gətirərək, Azərbaycanın münaqişədəki status-kvo vəziyyətindən razı olmadığını yazıb: “Elmar Məmmədyarov Dağlıq Qarabağ münaqişəsinin diplomatik yolla həllində maraqlı olduğunu və münaqişə həll olunduğu təqdirdə bunun təkcə Azərbaycan-Ermənistan yox, Türkiyə-Ermənistan münasibətlərinə də müsbət təsir edəcəyini, regional təhlükəsizlik və iqtisadi əməkdaşlığa ciddi töhfə verəcəyini bildirib”.
ABŞ Konqresinin Azərbaycanla bağlı İşçi Qrupunun üzvü Virginia Fox isə spiker Pellosiyə yolladığı bəyanatda yazıb ki, ABŞ Konqresində Ruanda, Kamboca, Bosniya, Darfur və sair yerlərdə törədilən soyqırımı faktlarına ciddi diqqət yetirildiyi halda, 1992-ci ildə Xocalıda baş verən hadisəyə qiymət verilməyib. Konqresmen 16 il əvvəldən başlayaraq Xocalı sözünün azərbaycanlılar üçün faciə, ağrı və kədər simvoluna çevrildiyini qeyd edib. Xanım Fox Ermənistanla Azərbaycan arasında müharibə zamanı erməni dəstələrinin Rusiyanın 366-cı motoatıcı alayının köməyi ilə Xocalıda 613 günahsız insanı qətlə yetirdiyini, minə yaxın insanı əlil etdiyini, 1275 nəfəri girov götürdüyünü və 150 nəfərin isə itkin saldığını bildirib. Konqresmen əvvəlki illərdə olduğu kimi, bu il də Xocalı sakinlərinin törədilmiş cinayətə görə ermənilərin məsuliyyətə cəlb edilməsini tələb etdiklərini vurğulayıb. Bəyanatının ikinci hissəsində xanım Fox “Human Right Watch” təşkilatının Xocalı soyqırımını “müharibədə qeydə alınmış ən böyük soyqırımı” adlandırdığını, burada qadınlara, uşaqlara və yaşlıları verilən işgəncələrin misilsiz olması barədə məlumatların faktlarla sübut edildiyini vurğulayıb. O, Rusiyanın insan haqlarını müdafiə edən “Memorial” təşkilatının hazırladığı hesabatda Ağdam xəstəxanalarına gətirilən Xocalı sakinlərinin dərilərinin soyulduğu və onlardan birinin başının kəsildiyi barədə məlumatların yer aldığını nəzərə çatdırıb. Bundan başqa, konqresmen “İndependent”, “Time”, Reuters, Newsweek, Avstraliyanın The Age və sair kütləvi informasiya vasitələrində Xocalı soyqırımı haqqında məqalələrin dərc edildiyini diqqətə çatdırıb: “Mən Konqresin bütün üzvlərini bu faciənin anılması üçün azərbaycanlılara qoşulmağa çağırıram. Dünya Xocalıda baş verənləri bilməli və yadda saxlamalıdır”.