Daxili siyasət

Ana səhifə

Daxili siyasət

Abbas Lisaninin cəzaçəkmə yeri dəyişdirilib

06 mart 2008 08:13 (UTC +04:00)

Bakı. Ramil Məmmədli - APA. İran azərbaycanlılarının hüquqları uğrunda hərəkatın liderlərindən olan Abbas Lisaninin cəzaçəkmə yeri dəyişdirilib. Bu barədə APA-ya A. Lisaninin həyat yoldaşı Ruqəyya Əlizadə məlumat verib. Onun sözlərinə görə, martın 5-də saat 13.30-da A. Lisani Əhər həbsxanasından Yəzd şəhərində yerləşən cəzaçəkmə müəssisəsinə köçürülüb. R. Əlizadə baş verənlərin İran qanunlarına ziddi olduğunu bildirib: “2007-ci il dekabrın 30-da keçirilən növbədənkənar məhkəmə prosesində Abbas Lisaninin cəzasını Əhər həbsxanasında çəkməsi haqqında qərar verilib. Bunlar isə qərarın ziddinə hərəkət edərək vəkili də məlumatlandırmadan Abbasın saxlanıldığı yeri dəyişiblər. Bu qərar siyasi xarakterlidir. Bir-birinin ardınca yeni məhkəmə iddialarının qaldırılması ilə Abbasın həbsxanadan çıxmasının qarşısını almağa çalışırlar”.
Qeyd edək ki, A. Lisani 2006-cı ilin may hadisələrinə təşkilatçılıq etməkdə təqsirləndirilərək həbs olunub. Ərdəbil İnqilab Məhkəməsi onu 18 ay müddətinə həbs cəzasına məhkum edib. 2007-ci il dekabrın 30-da keçirilən növbədənkənar məhkəmə prosesində A. Lisaninin cəza müddəti daha 1 il artırılıb. O, yanvarın 2-də saxlanıldığı Ərdəbildəki cəzaçəkmə müəssisəsindən Əhər şəhərindəki həbsxanaya köçürülmüşdü.