Daxili siyasət

Ana səhifə

Daxili siyasət

Azərbaycan MN-in sözçüsü: “Ermənistan rəhbərliyi 12 itki və 15 yaralılarının olması faktını hiyləgərliklə ört-basdır etməyə cəhd göstərir”

06 mart 2008 11:54 (UTC +04:00)

Bu sözləri APA-ya açıqlamasında Müdafiə Nazirliyinin mətbuat xidmətinin rəisi, polkovnik-leytenant Eldar Sabiroğlu deyib. R. Köçəryanın keçirdiyi mətbuat konfransında cəbhə xəttində baş verən atışma zamanı Ermənistan tərəfdən yalnız iki yaralının olması barədə fikirlərinə münasibət bildirən E. Sabiroğlu onun söylədiklərinin həqiqəti əks etdirmədiyini, tam yalan olduğunu vurğulayıb: “Sübut üçün yalnız bir faktı göstərmək kifayətdir. Robert Köçəryandan iki gün əvvəl mətbuat konfransı keçirən Ermənistanın xarici işlər naziri Vardan Oskanyan atışma zamanı çoxlu yaralının olması haqda həyəcanlı bəyanatlar verib, atışmanın dərhal dayandırılması barədə beynəlxalq təşkilatlardan kömək istəmişdi.Elə həmin gün Ermənistanın hərbi rəhbərliyi Azərbaycanın Müdafiə Nazirliyindən də atışmanı dayandırmağı xahiş etmişdi. İndi onların hansı düz danışır? Nəticəni özünüz çıxarın”.
Nazirlik sözçüsü deyib ki, Ermənistan rəhbərliyi bu hiyləgər üsulla 12 itki və 15 yaralılarının olması faktını ört-basdır etməyə cəhd göstərir: “Burada başqa bir niyyət də var. Son illər erməni ordusunun əfsanəvi gücə malik olması barədə süni şəkildə formalaşdırılan mifin Azərbaycan Ordusu tərəfindən darmadağın edilməsi onlara möhkəm yer edib. Ermənistan rəhbərliyi tərəfindən yayılan hazırkı dezinformasiyaların əsas mahiyyəti budur”.