Daxili siyasət

Ana səhifə

Daxili siyasət

Mustafa Kabakçı: “Türkiyə və Azərbaycana qarşı hücumlara birgə cavab verəcəyik”

30 aprel 2008 08:14 (UTC +04:00)

- Türkiyə ilə Azərbaycan arasında münasibətlərin indiki durumu Sizi qane edirmi?
- Türkiyə Cümhuriyyətinin qurulması zamanı ortaya bir iradə qoyulmuşdu. Bu iradə Mustafa Kamal Atatürkün iradəsi idi. Azərbaycanda isə bu iradəni Heydər Əliyev ortaya qoyub. Mustafa Kamal Atatürk bəyan edib ki, “Azərbaycanın sevinci sevincimiz, kədəri isə kədərimizdir”. Heydər Əliyev isə Türkiyə-Azərbaycan münasibətlərini “biz bir millət, iki dövlətik” deyə ifadə edib. Dünya mövcud olduqca, Azərbaycan-Türkiyə münasibətləri davam edəcək. Əslində birimizin düşməni hamımızın düşmənidir. Məsələn, ermənilər Osmanlı dövründə millət olaraq rahat yaşamalarına baxmayaraq, hazırda türkləri soyqırımı törətməkdə günahlandırırlar. Hazırda onlar Azərbaycana qarşı XX əsrin 20-ci illərində başladıqları işğalçılıq siyasətini davam etdirirlər. Türkiyənin bu münasibəti qəbul etməsi qeyri-mümkündür. Hazırda Azərbaycan torpaqlarının 20 faizi işğal altındadır. Biz bu işğal baş verəndə öz münasibətimizi sərt formada ortaya qoymuşduq, hazırda da bu mövqedə qalmaqdayıq. Bizə olan təzyiqlərə baxmayaraq, azərbaycanlı qardaşlarımızın yanındayıq. Bizim Ermənistana qarşı bu cür münasibətimiz Azərbaycanın işğal altında olan əraziləri azad olunandan, 1 milyondan çox qaçqın vətəninə geri dönəndən sonra dəyişə bilər. Türkiyədə 25 ildir terror aktları törədən PKK-nın səsi Qarabağdan gəlir. Görürsünüz, dostlar necə bir araya gəlirlərsə, düşmənlərimiz də o cür birləşirlər. Vaxtilə Heydər Əliyev, indi isə İlham Əliyev dünyanın axınını çox gözəl bilən insanlardır. Hazırkı prezidentin rəhbərliyi altında Azərbaycanın inkişaf edəcəyinə, yüksəkləri fəth edəcəyinə əminəm. Bakı-Tiflis-Ceyhan neft kəmərinin ardınca Bakı-Tiflis-Qars dəmir yol xəttinin işə düşməsi əlaqələrimizi daha da möhkəmləndirəcək. Hazırda Türkiyədə 100-ə yaxın azərbaycanlı iş adamı fəaliyyət göstərir. Onların hüquqları tərəfimizdən yüksək səviyyədə qorunur. Eyni isti münasibətin Azərbaycanda fəaliyyət göstərən türk iş adamlarına göstərilməsi bizi çox sevindirir. Eyni zamanda Azərbaycanla Türkiyə arasında gömrük sahəsində olan bəzi rüsumların aradan qaldırılması lazımdır. Bu iki ölkə arasındakı ticarət əlaqələrini daha da gücləndirmiş olacaq.
- Türkiyənin Avropa Birliyinə üzvlük məsələsi gündəmə gələndə Türkiyə-Ermənistan sərhədlərinin açılması məsələsi gündəmə gətirilir. Buna münasibətiniz necədir?
- Dünyada kimin kimi müdafiə etdiyi hamıya məlumdur. Bizim yerimiz Azərbaycanın yanındadır. Ona görə də kimin nə söyləməsindən asılı olmayaraq biz Azərbaycanı dəstəkləyirik. Azərbaycanın ərazi bütövlüyünə qarşı bir təcavüz edilib və 1 milyondan çox qardaşımız yurd-yuvasından didərgin düşüb. Bu reallıq dəyişməyincə, Türkiyə heç bir addım atmayacaq.
- Türkiyənin xarici işlər naziri Ermənistanın xarici naziri ilə müəyyən danışıqların apara biləcəyini bəyan edib. Bu bəyanatın arxasında nə dayanır?
- Bir daha deyirəm ki, Türkiyənin bu məsələyə münasibəti dəyişməyəcək. Ölkələr arasında danışıqlar aparıla bilər, amma bu danışmalar haqsızlığı ortadan qaldırmır. Dövlət məmurları aralarında danışıqlar gedə bilər, amma biz bu danışıqlarda Azərbaycanın üzləşdiyi ədalətsizliyin aradan qaldırılmasının vacib olduğunu bir daha vurğulayacağıq.
- Qeyd etdiniz ki, PKK terror təşkilatının səsi hazırda işğal altında olan Azərbaycan torpaqlarından gəlir. Belə olan halda Türkiyə Şimali İraqda keçirdiyi antiterror əməliyyatını Azərbaycan ordusu ilə birgə Qarabağda da keçirə bilərmi?
- Hər şeyi öz zamanında müzakirə etmək lazımdır. Biz öz gələcəyimizin necə olacağını birgə fikirləşməliyik. Ona görə də Azərbaycan və Türkiyənin taleyi ilə bağlı müəyyən planlar quranlar bilməlidirlər ki, biz bir millətik və bizə qarşı hücumlara da birgə cavab verəcəyik. Əgər PKK işğal altında olan ərazilərdə yuva qurmağa başlasa, Türkiyənin hökmən buna qarşı çıxacağını bilməlidir.
- Türk dövlətlərinin Parlament Assambleyasının formalaşdırılması istiqamətində işlər gedirmi?
- Artıq baş nazir müavinləri səviyyəsində Antalyada türk dövlətlərinin bir toplantısı reallaşıb. Bir müddət sonra isə parlament spikerlərinin analoji görüşlərinin keçirilməsi nəzərdə tutulur. Qeyd dediyiniz məsələyə tədricən keçid edəcəyik.
- Türkmənistan və Özbəkistan Türk Dövlətləri Birliyindən özlərini müəyyən dərəcədə təcrid edirlər. Həmin ölkələrlə əlaqələrin daha da gücləndirilməsi istiqamətində işlər nə yerdədir?
- Əlaqələrin yenidən dərinləşməsi istiqamətində addımlar atılır. Hazırda bir nazirimiz Özbəkistandadır. Türkmənistanla da eyni səviyyədə görüşmələr edilməkdədir. Bütün bunlar davamlı ayrılıqlar deyildir. Qardaşlar arasında da hərdən bu cür problemlər yaşanır. Türk dövləti olaraq biz bir-birimizə güvənməli və biri digərini daha da irəliyə aparmaq üçün əlindən gələni etməlidir.
- AKP-nin fəaliyyətinin dayandırılmasına dair məhkəmə prosesinin nəticələrini necə proqnozlaşdırırsınız?
- Türkiyədə azad məhkəmə sistemi var, hüquqlara hər kəs hörmətlə yanaşır. Biz AKP olaraq hüquqi hazırlıqlarımızı görürük. Qanun nə cür tələb etsə, o cür də olacaq. Türkiyədə qanun qarşısında hər kəsin boynu tükdən də incədir. Artıq hüquqi prosedurun həyata keçirilməsi başlayıb, ona görə də bu məsələyə çox da toxunmaq lazım deyil.
- Belə fikirlər səslənir ki, AKP-nin Türk dünyası ilə bağlı siyasəti əvvəlki iqtidarın yürütdüyü siyasətdən fərqlidir...
- Bu, heç də belə deyil. AKP Türk dünyasına qarşı münasibətdə son dərəcə həssasdır. Hazırda hər il türk dövlətlərindən 15 min tələbə Türkiyədə təhsil almağa gəlir. AKP olaraq əsas hədəfimiz bu əlaqələri daha da dərinləşdirməkdir.