Daxili siyasət

Ana səhifə

Daxili siyasət

Dünya Azərbaycanlıları Konqresində nə baş verir?

05 may 2008 10:13 (UTC +04:00)

O bildirib ki, qurum daxilində gedən proseslər təşkilatın parçalanmasına gətirib çıxara bilər: “Bu vəziyyət davam edənə qədər nə Qulamrza Səbri Təbrizinin, nə də Sabir Rüstəmxanlının keçirmək istədiyi qurultaya qatılmayacağam”.
DAK-ın keçmiş sədri Cavad Derəxti də mayın 23-25-də Almaniyanın Köln şəhərində keçiriləcək qurultayda birliyə nail olunacağına inanmır: “Sabir Rüstəmxanlının sədr olmasına səs vermişəm və onu sona qədər dəstəkləyirəm. Amma qurultaya getməyəcəyəm. Çünki öncə birgə fəaliyyətə dair razılaşma əldə olunmalıdır”.
Ana Vətən Partiyasının sədri, DAK üzvü, deputat Fəzail Ağamalının fikrincə, təşkilat daxilində baş verən proseslərdə xarici qüvvələrin rolu var: “1997-ci ildə ABŞ-da keçirilən qurultayda anladım ki, İran rejimi qurumda təfriqəçilik salmaq istəyir. Bu siyasət indi də davam edir”.
Milli Məclisin deputatı, DAK Ali Məclisinin keçmiş üzvü Qüdrət Həsənquliyev isə parçalanmaya meyl göstərən şəxsləri birliyə çağırıb. O, DAK-ın qurultayında iştirak edəcəyini deyib.
DAK sədrliyinə iddialı Qulamrza Səbri Təbrizi hazırda quruma rəhbərlik etdiyini və təşkilat adından danışanların fırıldaqçılıqla məşğul olduğunu söyləyib. O, fikir ayrılığı yaradanların DAK-dan uzaqlaşdıracağını bəyan edib: “Bəzilərinin hərəkətlərini uşaq şıltaqlığına bənzədirəm. İyunda keçirilən qurultayda şıltaqlıq edənlərin hamısını DAK-dan uzaqlaşdıracağıq və quruma yeni nəfəs verəcəyik”.
DAK sədrliyinə iddialı Sabir Rüstəmxanlı isə mayın 23-25-də keçiriləcək qurultayın legitimliyini tanımayanları təfriqəçilikdə ittiham edib: “Onlar hamını üz-üzə qoymağa çalışırlar. Hərə bir kooperativ yaradıb sədr olmaq istəyir”. S. Rüstəmxanlı DAK-da sabitliyə nail olmağın yolunu təşkilatda təmizləmə aparılmasında görür: “Qurultayda və sonrakı mərhələdə qurum daxilində təmizləmə aparılacaq”.
Xarici Ölkələrdə Yaşayan Azərbaycanlılarla İş üzrə Dövlət Komitəsinin sədr müavini Valeh Hacıyev təmsil etdiyi komitənin DAK-da baş verənlərdən narahat olduğunu bildirib. O, məsələlərə aydınlıq gəlməsi üçün növbədənkənar qurultayın keçirilməsini gözlədiklərini söyləyib: “Bu qurultayda seçiləcək heyətlə çalışmağa hazırıq. Ancaq bu şərtlə ki, qurumun fəaliyyətində azərbaycançılıq ideyası qabardılsın”. O, qurultaydan öncə tərəflər arasında razılıq əldə olunmasının zəruriliyini də qeyd edib: “Komitə sədri Nazim İbrahimovun da tövsiyəsi bu oldu ki, qurultaydan öncə tərəflər bir araya gəlsinlər və razılıq əldə etsinlər. İstənilən halda DAK-da belə bir vəziyyətin yaranması heç kimə şərəf gətirmir”.