Daxili siyasət

Ana səhifə

Daxili siyasət

Azərbaycan prezidenti və İordaniya kralı birgə bəyannamə qəbul ediblər

05 may 2008 17:13 (UTC +04:00)

Görüşdə dövlət başçılarının xanımları Mehriban Əliyeva və Raniya da iştirak ediblər. Görüşdə ikitərəfli münasibətlərin müxtəlif sahələrdə uğurla inkişaf etdiyi, əlaqələrin daha da genişlənməsi üçün yaxşı imkanların olduğu vurğulanıb. Dövlət başçıları yüksək səviyyədə qarşılıqlı səfərlərin əhəmiyyətini qeyd ediblər və indiki səfərin də ölkələrimiz arasında əlaqələrin daha da genişlənməsinə xidmət etdiyini bildiriblər. Söhbət zamanı ikitərəfli münasibətlərə, regional və beynəlxalq məsələlərə dair fikir mübadiləsi aparılıb.
Görüşdən sonra hər iki ölkə rəhbəri birgə bəyannamə qəbul ediblər. Bəyannamədə bildirilir ki, İordaniya ilə Azərbaycan arasında diplomatik münasibətlər qurulmasının 15-ci ildönümü ilə əlaqədar olaraq, tərəflər iki ölkə arasında son illərdə əlaqələrin sürətlə inkişaf etməsini və dərinləşməsini razılıqla qeyd edirlər. Hər iki tərəf Azərbaycanla İordaniya arasında möhkəmlənən dostluq münasibətlərini, eləcə də beynəlxalq məsələlərlə əlaqədar öz ölkələrinin üst-üstə düşən maraqlarını məmnunluqla vurğulayıb, müxtəlif iqtisadi və ticarət xarakterli tədbirlərin, o cümlədən hazırda Bakıda davam edən İordaniyanın ticarət sərgisi və son bir il ərzində biznes heyətlərinin səfər mübadiləsinin həyata keçirilməsi də daxil olmaqla, hər iki ölkənin özəl sektorları arasında əlaqələrin inkişafının sürətlənməsindən xüsusi məmnunluqlarını ifadə ediblər. Bundan başqa, bəyannamədə ikiqat vergiqoymanın aradan qaldırılması və investisiyaların təşviqi və qorunması sazişlərinin imzalanmasını alqışlanıb. Hər iki dövlət başçısı həmçinin neft və qaz kəşfiyyatı, nəqliyyat, kənd təsərrüfatı, təhsil və xidmətlər sahəsində də əməkdaşlığın davam etdirilməsi barədə razılığa gəliblər. Bundan başqa, tərəflər BMT və onun ixtisaslaşmış strukturları çərçivəsində əməkdaşlığı bundan sonra da davam etdirəcəklərini bildirib, beynəlxalq münaqişələrin həllində BMT-nin rolunun gücləndirilməsinin vacibliyini vurğulayıblar. Bəyannamədə qeyd olunur ki, tərəflər, aqressiv separatizmin artan təhlükəsini qeyd edərək, terrorizm də daxil olmaqla, separatist rejimlərin silah və insan alveri, narkotik maddələrin istehsalı və yayılması, beynəlxalq təhlükəsizlik və sabitliyi təhdid edən digər cinayətkar fəaliyyətləri ilə əlaqədar narahatlıq ifadə etdilər, beynəlxalq birliyi bu cür fəaliyyətlərə qarşı zəruri tədbirlər görməyə çağırırlar. Bundan başqa, sənəddə beynəlxalq səviyyədə tanınmış sərhədlərin dəyişdirilməsi məqsədi ilə zor işlətməyin və zor işlətməklə hədələmənin qəbuledilməzliyi bir daha təsdiq olunub.