Daxili siyasət

Ana səhifə

Daxili siyasət

Əflatun Amaşov: “Mətbuat Şurasının hüquqi statusunun müəyyənləşdirilməsinin vaxtı çatıb”

16 may 2008 10:27 (UTC +04:00)

Bunu APA-ya müsahibəsində Azərbaycan Mətbuat Şurasının (MŞ) sədri Əflatun Amaşov qurumun növbəti qurultayına hazırlıqla bağlı sualı cavablandırarkən bildirib. MŞ sədri deyib ki, bu qurultayda da İdarə Heyəti 9 jurnalistdən, 6 ictimaiyyət təmsilçisindən formalaşdırılacaq. Səsvermə bülletenlərinə 27 jurnalistin, 18 ictimaiyyət nümayəndəsinin adı daxil ediləcək. Onların adları təsisçi KİV-lərə ünvanlanmış məktublara verilən cavablar əsasında müəyyənləşəcək. Təşkilat Komitəsi qurultayda gündəlik qəzetlərdən, informasiya agentliklərindən və jurnalist təşkilatlarından 2, həftəlik və aylıq qəzetlərdən, jurnallardan bir nümayəndənin iştirakını nəzərdə tutub.
Məlumdur ki, təsisçi KİV-lərin Şura ilə əlaqələrinin mövcudluğunu təsdiqləyən mühüm amillərdən biri onların üzvlük haqqı ödəmələridir. Qurumun rəhbəri qeyd edib ki, bu məsələ Nizamnamədə də əksini tapıb: “Ötən illərə nisbətən bu sahədə vəziyyət xeyli yaxşılaşıb. Lakin elə təsisçilər də var ki, Şura yaranandan bu günədək üzvlük haqqı ödəməyiblər. Təəssüf ki, belələrinin sırasında tanınmış nəşrlər də var. Əlbəttə, qurultay Nizamnamədən irəli gələn tələblər əsasında keçiriləcək. Düşünürəm ki, qarşıdakı vaxt ərzində onlar üzvlük haqqını ödəməklə ali məclisdə səsvermə hüququ əldə edəcəklər”. Ə. Amaşov “Qurultayda rəqabətin güclü olacağını proqnozlaşdırmaq mümkündürmü?” sualına cavabında bu qurultayın beşinci olacağını xatırladıb: “Elə bilməyin ki, digərlərində hadisələr sakit məcrada cərəyan edib. Diskussiyalar, müzakirələr, mübahisələr dövri mətbuata baxsanız, bu yaşantıları əks etdirən kifayət qədər material görərsiniz. Bütün həqiqətlər, işlərin daha yaxşı qurulması üçün irəli sürülən təkliflər məhz canlı toplantılar zamanı ortaya çıxır. Qarşıdakı qurultayımızı da belə görmək istərdim. İndidən ali məclisimizin işgüzar şəraitdə keçəcəyinə, ölkə jurnalistikasının və Mətbuat Şurasının qarşıdakı illər üçün yaşantılarına yeni keyfiyyət dəyişikləri gətirəcəyinə dərin inamım mövcuddur. Bir halda ki, bu yaşantılarla üzbəüzük, son vaxtlar işlədilən rəqabət ifadəsinə də münasibətimi bildirmək istərdim. Öncə deyim ki, gərginlik fonunda müəyyən rəqabət işartıları həmişə gözə dəyib. Amma iddiaları qurultaylar tənzimləyib. Məsələni sırf rəqabət kontekstində qoymağı doğru yanaşma saymıram. Çünki onun tərəflərini görmürəm. Hər halda, son söz qurultayındır”.
MŞ sədri “Azadlıq” qəzetinin jurnalisti Aqil Xəlillə bağlı istintaq prosesi ilə bağlı suala cavabında mayın 14-də Baş Prokurorluğun Ağır Cinayətlərə Dair İşlər üzrə İstintaq İdarəsində keçirilmiş son dindirilmə prosesində rəhbərlik etdiyi qurumun nümayəndəsinin də iştirak etdiyini vurğulayıb: “Proses normal keçib. Jurnalist müstəntiqin ona verdiyi sualları cavablandırıb. Məncə, heç bir tərəf narazı qalmayıb. O ki qaldı Aqil Xəlilin ölkəni tərk edə bilməsinə, mənə elə gəlir ki, burada elə bir problem olmamalıdır. Çünki o, təqsirləndirilən deyil, zərərçəkən şəxsdir. Lazımi izahat da verib. Əgər ölkədən çıxmasında çətinliklər olsa, Mətbuat Şurası ona kömək göstərə bilər”.
Ə. Amaşov “Kütləvi informasiya vasitələri haqqında” qanuna edilmiş son dəyişiklikləri də şərh edib. O deyib ki, son düzəlişdən də açıq-aydın görünür ki, qanunun 9-cu maddəsinin mübahisələrə səbəb 10-cu hissəsi hələ qalır: “Məhz bu hissədə Mətbuat Şurasına müvafiq icra hakimiyyəti orqanının səlahiyyətləri verilir. Burada söhbət ondan gedir ki, Mətbuat Şurası ildə 12 dəfə işıq üzü görməyən, birdəfəlik tirajı 100 nüsxədən az olan, daimi adı və digər zəruri rekvizitləri olmayan KİV-lərin istehsalına və yayımına xitam verilməsi barədə məhkəmə qarşısında iddia qaldıra bilər. Yada salım ki, hələ jurnalistlərin IV qurultayında biz bu məsələlərlə bağlı müzakirə aparmışdıq. Qəbul olunan qərardadda göstərilirdi ki, bununla bağlı müvafiq qurumlar qarşısında məsələ qaldıraq. Digər məsələ ölkədə fəaliyyət göstərən yazılı KİV-lərin məcburi nüsxələrinin Mətbuat Şurasına da göndərilməsiydi. Üçüncü düzəliş isə yeni KİV təsis edərkən dövlət qurumlarının adından istifadə edilməsi qaydalarını nəzərdə tutur. Ötən ilin dekabrında son iki düzəlişi təsbit edən müvafiq dövlət sənədləri qəbul olunub. Onu da deyim ki, son düzəlişin xüsusi effektiv cəhətlərindən biri onun “reket” jurnalistikaya qarşı daha tutarlı mübarizə aparmağa imkan verməsidir. Qeydiyyatdan keçən qəzetlərin sayı 3000-dən artıqdır. Çoxu işıq üzü görməyən bu qəzetlərin təmsilçiləri bölgələrdə, iri müəssisələrdə olur, ayrı-ayrı vətəndaşları, idarə, müəssisə, təşkilat rəhbərlərini şantaj edirlər. Şuraya daxil olan şikayətlərin əksər hissəsi məhz belələrindəndir... Sənəddə Mətbuat Şurası müvafiq icra hakimiyyəti orqanı kimi göstərilib. Hazırda isə Mətbuat Şurası statusuna görə ictimai təşkilatdır. Bunları nəzərə alaraq biz qurultaya qədər hüquqşünaslardan ibarət işçi qrupu formalaşdırmağı planlaşdırırıq. Buraya müstəqil ekspertlərlə yanaşı Prezident Aparatı, Ədliyyə Nazirliyi və digər qurumlardan da mütəxəssislər cəlb ediləcək. Görünür, Mətbuat Şurasının hüquqi statusunun müəyyənləşdirilməsinin vaxtı çatıb”.