Daxili siyasət

Ana səhifə

Daxili siyasət

Azərbaycan Milli Məclisinin AŞ PA-dakı nümayəndə heyətinin üzvləri həmməruzəçilərlə görüşüblər

19 may 2008 13:42 (UTC +04:00)

Bakı. Elbrus Seyfullayev - APA. Azərbaycan Milli Məclisinin Avropa Şurası Parlament Assambleyasındakı (AŞ PA) nümayəndə heyətinin üzvləri qurumun Bakıda fakt-araşdırıcı səfərdə olan Monitorinq Komitəsinin həmməruzəçiləri Andres Herkel və Yevgeniya Jivkova ilə görüşüblər. Parlamentin mətbuat xidmətindən APA-ya daxil olan məlumata görə, görüşdə Azərbaycanın AŞ PA-dakı nümayəndə heyəti rəhbərinin müavini Əli Hüseynov Azərbaycanın qurum qarşısında götürdüyü öhdəliklərin icrasına xüsusi diqqət yetirdiyini deyib: “Həmin öhdəliklərin böyük bir qismi yerinə yetirilib. “Seçki Məcəlləsinə əlavə və dəyişikliklər edilməsi haqqında” və “Sərbəst toplaşmaq azadlığı haqqında” qanuna əlavə və dəyişikliklər haqqında” qanun layihələri daimi komissiyalarda müzakirədən keçib. Hər iki qanun layihəsi yaxın vaxtlarda Milli Məclisin plenar iclasında müzakirəyə çıxarılacaq”. Ə. Hüseynov “Alternativ xidmət haqqında” qanun layihəsi üzərində də işlərin yekunlaşmaq üzrə olduğunu deyib.
Öz növbəsində, A. Herkel səfərdə məqsədin Azərbaycanda vətəndaşların Konstitusiya hüquqlarının təsbiti, eləcə də Seçki Məcəlləsinə və “Sərbəst toplaşmaq azadlığı haqqında” qanuna təklif olunan əlavə və dəyişikliklərlə bağlı məsələlərin monitorinqini aparmaq olduğunu bildirib.