Daxili siyasət

Ana səhifə

Daxili siyasət

Penitensiar Xidməti İlqar Məmmədova təzyiq edilməsi ilə bağlı xəbərlərə münasibət bildirib

21 sentyabr 2013 15:05 (UTC +04:00)

Bakı – APA. «Bəzi KİV-də barəsində qaldırılmış cinayət işi üzrə keçirilən məhkəmə prosesi zamanı təqsirləndirilən şəxs İlqar Məmmədova istinadən Penitensiar Xidmətin məsul əməkdaşı tərəfindən guya ona təzyiq edildiyi və oktyabrın 9-da keçiriləcək prezident seçkilərində müəyyən edilmiş namizədə səs verməyə təklif olunduğu barədə həqiqətə uyğun olmayan məlumatlar dərc edilib». APA-nın xəbər verdiyi kimi, bu barədə Ədliyyə Nazirliyi Penitensiar Xidmətinin bu gün yaydığı rəsmi açıqlamasında bildirilir.

Məlumatda qeyd olunub ki, Azərbaycan keçiriləcək prezident seçkiləri ilə əlaqədar Penitensiar Xidmətin tabe qurumlarında lazımi hazırlıq işləri aparılır. Belə ki, tabe qurumların kitabxanaları seçkiləri tənzimləyən normativ hüquqi aktlarla təmin edilib, xidmət əməkdaşları tərəfindən istintaq təcridxanalarında və cəzaçəkmə müəssisələrində saxlanılan şəxslərə qanunvericiliyin tələbləri izah olunur, müvafiq seçki prosedur qaydaları cəza çəkənlərin nəzərinə çatdırılır. Eyni zamanda, mövcud qanunvericiliyə uyğun olaraq prezidentliyə namizədlərin təbliğat-təşviqat plakatlarının, onların seçkiqabağı platformalarını əks etdirən müvafiq sənədlərin nəzərdə tutulmuş müddətlərdə tabe müəssisələrin görünən yerlərindən asılması təmin ediləcək.

«Xidmətin Baş İdarəsinin məsul əməkdaşları, habelə cəzaçəkmə müəssisələrinin rəhbərliyi tərəfindən hər hansı təqsirləndirilən şəxsin və ya məhkumun keçiriləcək Prezident seçkiləri zamanı bu və ya digər namizədin lehinə səs verməsini təmin etmək məqsədi ilə onlara təzyiqlərin edilməsi barədə məlumatlar həqiqəti əks etdirmir, real vəziyyəti təhrif edir və ucuz sensasiya xatirinə əlavə diqqətin cəlb edilməsi məqsədi güdür. Seçkilərin istintaq təcridxanalarında və cəzaçəkmə müəssisələrində şəffaf, sərbəst səsvermə yolu keçirilməsi təmin ediləcək, seçki hüququna malik olan bütün təqsirləndirilən şəxslərin və məhkumların azad, sərbəst, seçki qanunvericiliyinə uyğun səs vermələri üçün bütün lazımi şərait yaradılacaq», - deyə Penitensiar Xidmətin bəyanatında vurğulanır.