Ədəbiyyat

Ana səhifə

Ədəbiyyat

Elbrus Ərudun ilk kitabı çapdan çıxıb

03 noyabr 2008 13:36 (UTC +04:00)

Bakı. Kəmalə Quliyeva - APA. APA İnformasiya Agentliyinin əməkdaşı Elbrus Seyfullayevin (Ərud) ilk kitabı çapdan çıxıb. “Yaza bilmədiklərim” adlı kitabda jurnalistin son 3 ildə qələmə aldığı hekayələr, ədəbi-bədii yazılar, jurnalistlərin qarşılaşdığı maraqlı hadisələrdən topladığı silsilələr, APA-da işlədiyi müddətdə Azərbaycanın tanınmış yazıçı və şairləri ilə müsahibələri yer alıb.

Kitabı niyə məhz “Yaza bilmədiklərim” adlandırmasına aydınlıq gətirən E. Ərud bunu yaza bilmədiklərinin yaza bildiklərindən çox olması ilə izah edib: “Dünyanın ən yaxşı xəbərləri redaksiyalarda ölür. Yazdıqlarımız əslində bildiklərimizin ən maraqsızı, qeyri-səmimisi , bəlkə də heç kimə lazım olmayanlarıdır. Bəzən sənin bir addımlığında ən gözəl xəbər olur, amma sən onu yaza bilmirsən. Jurnalistikada rast gəldiyim maraqlı hadisələr, lətifə şəkilində doğulan xəbərlər, mənim üçün indiyə qədər yazdıqlarımın ən maraqlısı olub bəlkə də. Buna görə də özümün, yaxın həmkarlarımın tez-tez rastlaşdığımız, yaza bilməyib kadr arxasında saxladığımız hadisələri qələmə alıb, oxucuların diqqətinə çatdırmaq qərarına gəldim”.

Yazıçı publisist, millət vəkili Aqil Abbas kitaba yazdığı ön sözdə Azərbaycan ədəbiyyatına istedadlı bir yazıçının gəldiyini bildirir: “Mən onun yazılarına baxanda gördüm ki, Azərbaycan ədəbiyyatına gənc, istedadlı bir yazıçı gəlir. Bu kitabda Elbrusun təkcə bədii yaradıcılığı deyil, jurnalistikası da var. Elbrus kimdən müsahibə alıbsa, onu yerindən oynada bilib. Oxucular görəcəklər ki, bu müsahibələr adi müsahibələr deyil, on ildən, iyirmi ildən sonra ədəbiyyata çevriləcək nümunələrdir. Bu müsahibələri alan adam əvvəl-axır ədəbiyyata gəlməli idi”.