Ədəbiyyat

Ədəbiyyat

Əli bəy Hüseynzadənin ikicildlik seçilmiş əsərlərinin təqdimatı keçirilib

09 yanvar 2009 10:04 (UTC +04:00)

Bakı. Kəmalə Quliyeva –APA. Bu gün Azərbaycan Milli Elmlər Akademiyasının (AMEA) Nizami Gəncəvi adına Ədəbiyyat İnstitutunda Azərbaycan ictimai-ədəbi fikrinin görkəmli nümayəndəsi Əli bəy Hüseynzadənin ikicildlik seçilmiş əsərlərinin təqdimat mərasimi keçirilib. APA-nın məlumatına görə, tədbiri giriş sözü ilə açan institutun direktoru Bəkir Nəbiyev bildirib ki, Azərbaycanın müstəqillik ideologiyasının banilərindən olan Əli bəy Hüseynzadəyə qarşı SSRİ dövründə haqsız hücumlar olub, onun da adının digər ideoloqlar kimi çəkilməsi yasaqlanıb.
B. Nəbiyevin sözlərinə görə, Əli bəy Hüseynzadənin yaradıcılığı Azərbaycanın müstəqillik qazandığı və türk dövlətləri içərisində öz layiqli yerini tutduğu bir zamanda daha çox öyrənilməli və təbliğ edilməlidir.
Professor Şamil Vəliyev isə bildirdi ki, Əli bəy Hüseynzadə təzadlı və gərgin həyat yaşayıb: “Dərc olunan əsərlər Əli bəy Hüseynzadə yaradıcılığının seçilmiş nümunələridir. Onun əsərlərinin tam külliyyatı isə Azərbaycan və Türkiyə arxivlərindədir. Əli bəy Hüseynzadə ilk ana dilli qəzet nümunəsi yaradan şəxsiyyətdir. Onun böyük xidmətlərindən biri də Azərbaycanda ictimai ünsiyyəti formalaşdıran mətbuat yaratmasıdır. Azərbaycanın üç rəngli bayrağının simvolu məhz Əli bəy Hüseynzadənin “Türk hissiyyatlı, islam etiqadlı, Avropa düşüncəli fədai lazımdır” ideologiyası əsasında yaranıb”.
Azərbaycan Mətbuat Şurasının sədri Əflatun Amaşov isə bildirdi ki, Əli bəy Hüseynzadə böyük ideoloq, publisist, jurnalist, nasir olub: “Əli bəy Hüseynzadə Azərbaycan mətbuatı üçün də, türk milləti üçün də əvəzsizdir. Nizami Gəncəvi şərq ədəbiyyatında hanı rolu oynayırsa, Əli bəy Hüseynzadə də türk dövlətləri üçün həmin rolu oynayıb”.