Ədəbiyyat

Ana səhifə

Ədəbiyyat

Azərbaycan Yazıçılar Birliyinin katibi: ““Ədəbiyyat” qəzetinin rəhbərliyi dəyişdirilməlidir”

07 aprel 2009 10:21 (UTC +04:00)

Bakı. Elbrus Seyfullayev - APA. “Azərbaycan Yazıçılar Birliyinin katibi kimi hesab edirəm ki, “Ədəbiyyat” qəzetinin rəhbərliyi dəyişdirilməlidir. “Ədəbiyyat” qəzetinin ona ayrılan maliyyə ilə belə zəif çıxması bizim üçün də təəssüfləndiricidir. Mən Yazıçılar Birliyinin ədəbi orqanlarının səviyyəsi haqda yazılan fikirlərə haqq qazandırmıram, amma doğurdan da “Ədəbiyyat” qəzetinə ayrılan vəsait çox görünə bilər”. Bu sözləri APA-ya açıqlamasında Azərbaycan Yazıçılar Birliyinin Gənclər üzrə katibi Rəşad Məcid təşkilatda korrupsiya hallarının baş verməsi və ədəbi orqanlarının aşağı səviyyədə olması ilə bağlı fikirlərə münasibət bildirərkən deyib. Gənclər üzrə katib daha çox tənqid olunan “Ədəbiyyat” qəzeti haqqında yazılanlarla razılaşdığını da bildirib. Onun sözlərinə görə, qəzet zəif çıxır, Azərbaycan ədəbiyyatında gedən prosesləri, yazıçıların fikirlərini lazımı qədər işıqlandıra bilmir: “Qəzet daha böyük həcmdə çıxa bilər. Bu məsələ ilə bağlı Yazıçılar Birliyində dəfələrlə müzakirə aparılıb. Yəni biz özümüz problemi bilirik və onu müzakirə etmişik. Mən inanıram ki, bu problem həllini tapacaq. Güman edirəm ki, “Ədəbiyyat” qəzetinə orta və ya gənc nəsildən yeni baş redaktor gətirilsə, problem həll oluna, qəzet keçmişdəki nüfuzunu qaytara bilər”.

R. Məcid Yazıçılar Birliyinin digər ədəbi orqanları ilə bağlı da müəyyən mənada tənqidi fikirləri səsləndirməyin mümkün olduğunu deyib: “Ancaq bizim jurnalları bu adamların buraxdığı jurnallarla müqayisə etsək deyə bilərəm ki, onların jurnalları ədəbi ictimaiyyətə heç də geniş tanış deyil. Azərbaycan ictimaiyyəti onların buraxdığı jurnalları oxusa, görər ki, onlar xalqa, mənəviyyata ciddi zərbə vururlar. Son illər ədəbi ictimaiyyətdə hadisə hesab olunan Əkrəm Əylislinin “Ətirşah Masan”, Aqil Abbasın “Dolu” romanları və digər əsərlər də Yazıçılar Birliyinin ədəbi orqanlarında dərc olunub. Ümumiyyətlə isə ədəbi jurnallar indiki Azərbaycan ədəbiyyatının mənzərəsidir. Son illər ədəbiyyata maraq itir. Bu da özünü ədəbi jurnallarda göstərir”.

R. Məcid Yazıçılar Birliyində korrupsiya hallarının baş verməsi ilə bağlı yazılanların kampaniya xarakteri daşıdığını da deyib: “Təşkilatın əleyhinə olan bir neçə adam var. Onlar özləri də boyunlarına alırlar ki, böhtan, yalan informasiya yaymaqda məqsədləri Yazıçılar Birliyinin rəhbərliyini bezdirmək, şərləməkdir. Biz onlara çox fikir vermək istəmirik. Büdcə ilə bağlı səslənən fikirlər gəlincə, deyə bilərəm ki, qurumun büdcəsi şəffafdır. Bizim bütün xərclərimiz haqqında məlumatlar internetdə yerləşdirilib. İstifadə olunmayan vəsait isə ilin axırında dövlətə qaytarılır”.

“Ədəbiyyat” qəzetinin baş redaktoru Ayaz Vəfalı isə APA-ya açıqlamasında hər kəsin istənilən fikri səsləndirməkdə sərbəst olduğunu deyib. Baş redaktor çıxardığı qəzetin göz qabağında olduğunu da bildirib: “Qəzetin haqqında yazan adamların ədəbiyyatdan xəbəri yoxdur”Ⅶ

Ayaz Vəfalı Rəşad Məcidin də fikirlərinə münasibət bildirib: “Onun çıxardığı qəzeti də, bizim qəzeti də görürsünüz. Biz hamının xoşuna gələ bilmərik. Bu onun fikridir”.

Qeyd edək ki, Azərbaycan Yazıçılar Birliyinin ədəbi orqan olan “Ədəbiyyat” qəzeti həftədə bir dəfə 6 səhifə çıxır. Qəzetə 2009-cu il üçün 200 min manatdan artıq vəsait ayrılıb.