Ədəbiyyat

Ana səhifə

Ədəbiyyat

Ülvi Bünyadzadənin 40 illik yubileyi münasibətilə “Ömür yolu” kitabının təqdimatı keçirilib

24 sentyabr 2009 08:43 (UTC +04:00)

Bakı - APA. Azərbaycan Yazıçılar Birliyinin (AYB) “Natəvan” klubunda şəhid-şair Ülvi Bünyadzadənin 40 illik yubileyi qeyd olunub. APA-nın məlumatına görə, yubiley münasibətilə Ü. Bünyadzadənin Gürcüstanda iki dildə nəşr olunmuş “Ömür yolu” kitabı, habelə Bakıda nəşr olunmuş eyni adlı kitabının beş dilli (ingilis, rus, türk, gürcü və Azərbaycan) variantı oxucuların ixtiyarına verilib. Birinci kitab millət vəkili Qənirə Paşayevanın dəstəyi, ikinci kitab isə Mədəniyyət və Turizm Nazirliyinin maliyyə yardımı ilə çap olunub.

Azərbaycan-Gürcüstan Parlamentlərarası Dostluq Qrupunun dəstəyi və “PenGUAM” təşkilatı ilə əməkdaşlığı çərçivəsində Tiflisdə bu günlərdə işıq üzü görən “Ömür yolu” kitabı Parlament Dostluq Qrupunun rəhbəri, millət vəkili Qənirə Paşayevanın həm 20 Yanvar hadisələrindən, həm də xalqımızın yaxın və keçməkeşli tarixindən bəhs edən “Dostluğun və oxşar taleyin nişanəsi” adlı giriş yazısı ilə açılır. Yazıda hər iki xalqın oxşar taleyindən, sovet basqısına məruz qaldığından, minlərlə günahsız qurban verilməsindən söhbət açılmaqla yanaşı, 20 Yanvar hadisələri ilə bağlı arxiv fotoşəkillərindən də istifadə olunub. Bu isə kitabı təkcə bədii fakt kimi deyil, həm tariximizlə bağlı vacib sənəd kimi də aktual edir.

Sonra oxucular şairin irsinin qoruyucusu, bibisi, filoloq Almaz Ülvinin «Mənim Ülvi dünyam» başlıqlı yazısı ilə tanış olurlar. Sonda isə Ülvinin «Ömür yolu» poeması verilir.

Azərbaycan və gürcü dillərində təqdim olunan materialların arasında Ülvinin məşhur «And»ının fotosurəti də yer alıb. «Qafqaz Evi» tərəfindən nəşr olunan kitabın tərcüməçisi Oqtay Kazımov, redaktoru tanınmış gürcü şairi Şota İataşvili, məsləhətçisi «Dünya ədəbiyyatı» jurnalının baş redaktoru, “PenGUAM” təşkilatının icraçı direktoru Səlim Babullaoğlu, rəssamı Kote Sulaberidzedir.

Mərasimin təşkilatçısı, şair, tərcüməçi Səlim Babullaoğlu giriş nitqində bildirib ki, kitabın çar olunmasında AYB-nin də xüsusi rolu olub.

Millət vəkili Qənirə Paşayeva isə Ü. Bunyadzadənin Azərbaycanın azadlığı yolunda canını qurban verdiyini deyib. Ü. Bunyadzadənin ölümündən əvvəl yazdığı “And”ı xüsusi qeyd edən millət vəkili 20 yaşlı gəncin bu cür “And” yazmasının gənclərə nümunə olduğunu vurğulayıb: “Çox təəssüflənirəm ki, Ülvinin doğum günü medianın diqqətindən kənarda qalır. Çalıb-oxuyanların, müğənnilərin və digərlərinin ad günləri yüksək səviyyədə təbliğ olunur, onlar haqqında verilişlər çəkilir, əslində isə həmin təbliğata, verilişlərə daha çox layiq olan Ülvi kimilər kənarda qalır. Belə gənclərin həyatının, ömür yolunun cəmiyyətin diqqətində olması çox vacibdir. Gənclərimiz onun kimilərdən örnək götürməlidirlər”.

Tədbirdə şəhidin bibisi Almaz Ülvi, AYB sədrinin müavini Nazim İbrahimov, Birliyin katibi Rəşad Məcid və digərləri də çıxış ediblər.

Xatırladaq ki, 23 sentyabr Ü. Bünyadzadənin doğum günüdür. Şairin 40 illiyi ərəfəsində çap olunan kitabın sentyabrın 19-da «Qafqaz Evin»də gürcü yazıçıları arasında ilkin təqdimatı və müzakirəsi də keçirilib.