Ədəbiyyat

Ana səhifə

Ədəbiyyat

Dillər Universitetində Milli Kitab Mükafatının təsisçiləri və münsiflər heyəti ilə tələbələrin görüşü keçirilib

17 noyabr 2009 20:42 (UTC +04:00)

Bakı – APA. Noyabrın 17-də Azərbaycan Dillər Universitetində (ADU) Milli Kitab Mükafatının təsisçiləri və münsiflər heyəti ilə tələbələrin görüşü keçirilib.

ADU-nun mətbuat xidmətindən APA-ya verilən məlumata görə, tədbirdə ADU-nun elmi işlər üzrə prorektoru, professor Dünyamin Yunusov, Xəzər Universitetinin rektoru, professor Hamlet İsaxanlı, “525-ci qəzet”in baş redaktoru Rəşad Məcid, yazıçı Afaq Məsud, “Əli və Nino” Nəşriyyat Evinin sahibi Nigar Köçərli və ADU-nun professor-müəllim, tələbə heyəti iştirak ediblər.

ADU-nun rektoru, professor Səməd Seyidovun salamlarını tədbir iştirakçılarının nəzərinə çatdıran professor Dünyamin Yunusov belə görüşlərin ADU-da keçirilməsinin gözəl hal olduğunu deyib: “Gənc nəsildə, ümumilikdə ictimaiyyətdə kitaba və kitab oxumağa həvəs yaratmaq, müasir dövrdə ədəbiyyatımızın inkişafına yardımçı olmaq məqsədilə həyata keçirilən belə tədbirlər böyük əhəmiyyətə malikdir”.

“Əli və Nino” Nəşriyyat Evinin sahibi Nərgiz Köçərli layihə haqqında tədbir iştirakçılarına məlumat verib. Layihənin Azərbaycan Mədəniyyət və Turizm Nazirliyinin təşkilati dəstəyi ilə həyata keçirildiyini deyən N.Köçərli qeyd edib ki, Milli Kitab Mükafatında müəllifin vətəndaşlığından asılı olmayaraq Azərbaycan dilində yazılmış hekayə, roman, povest və digər ədəbi üslublarda yazılmış nəsr əsərləri iştirak edə biləcək. Bundan əlavə, əsərin dilindən asılı olmayaraq, Azərbaycan vətəndaşı tərəfindən yazılmış əsərlər də təqdim oluna bilər.

“525-ci qəzet”in baş redaktoru Rəşad Məcid bu tədbirin ADU-da keçirilməsinin əhəmiyyətindən danışaraq bildirib ki, ADU-da fəaliyyət göstərən alimlər Azərbaycan elminin zirvələrində dayanan insanlardır.

Daha sonra çıxış edən natiqlər layihənin uğur qazanacağı, Azərbaycan ədəbiyyatının inkişafı yolunda yeni nailiyyətlər əldə olunacağı barədə inamlarını dilə gətiriblər.

Sonda layihənin təşkilatçıları və münsiflər heyəti tələbələri maraqlandıran sualları cavablandırıblar.