Ədəbiyyat

Ana səhifə

Ədəbiyyat

“Əli və Nino” romanının 70 illiyinə həsr olunmuş konfrans keçirilib

16 oktyabr 2007 14:59 (UTC +04:00)

Bu gün Almaniya-Azərbaycan Dostluq Cəmiyyətinin təşkilatçılığı ilə Qurban Səidin “Əli və Nino” romanının 70 illiyinə həsr olunmuş elmi-nəzəri konfrans keçirilib. APA-nın xəbərinə görə, tədbiri giriş sözü ilə cəmiyyətin sədri Çingiz Abdullayev açaraq bütün dünyada məşhur olan romanın və onun müəllifinin qəribə taleyindən danışıb: “Bu ilin sentyabrında “Əli və Nino” romanının nəşrinin 70 ili tamam oldu. Yubiley ərəfəsində Məhəmməd Əsəd bəy-Qurban Səid haqqında alman, ingilis, türk, italyan dillərində olan materialları, sənədləri, yazışmaları ilk dəfə Azərbaycan dilində çap etdik. Belə arxiv materiallarının gələcəkdə də çap olunacağına çalışacağıq”. Filologiya elmləri doktoru, professor Həsən Quliyev çıxışında Qurban Səid, Məhəmməd Əsəd bəy və Lev Nissimbaumun əslində eyni adam olduğunu bildirib. Tiflis Dövlət Universitetinin professoru Nana Qaprindaşvili romanın Gürcüstan-Azərbaycan ədəbi əlaqələrində mühüm səhifə olduğunu qeyd edərək kitabda gürcü xarakteri, koloriti və adət-ənənələrinin dəqiqliyi ilə əks olunduğunu söyləyib.
Qeyd edək ki, romanın müəllifi hesab edilən Lev Nissimbaum Bakıda - İçərişəhərdə yaşayıb, sonra atası ilə birlikdə 14-15 yaşında ikən Azərbaycandan mühacirət edib. Bir müddət Almaniyada yaşayıb, sonra İtaliyaya köçüb. Məzarı İtaliyada olan yazıçı onlarla kitab yazıb və nəşr etdirib. Kitabların hamısı “Əsəd bəy”, “Əli və Nino” və “Altunsaç” adlı romanlar isə “Qurban Səid” imzası ilə çapdan çıxıb. Süjet xəttində azərbaycanlı gənclə gürcü qızının məhəbbəti dayanan və ötən yüzilin əvvəllərində Qafqazda baş verən hadisələrin parlaq təsviri ilə yadda qalan “Əli və Nino” romanı dünyanın 28 dilinə tərcümə olunub. /APA/