Moskva. Fərid Əkbərov - APA. Rusiya paytaxtında azərbaycanlıya məxsus ərzaq mağazasına silahlı basqın olub.
APA-nın Moskva müxbirinin verdiyi məlumata görə, hadisə oktyabrın 2-də axşam saatlarında baş verib.
Paytaxtın Bojenka küçəsi-7 ünvanında yerləşən, azərbaycanlı S.N.Vəliyevə məxsus ərzaq mağazasına 5 nəfər əlisilahlı şəxs basqın edib. Basqınçılardan birinin üzündə qara maska olub. Onlar odlu silahdan havaya atəş açaraq satıcıya hədə-qorxu gəliblər və mağazadan 20000 rubl məbləğində pul aparıblar.
Faktla bağlı cinayət işi açılıb, araşdırma aparılır.