Lənkəran. Ağəddin Babayev - APA. Bu gün Azərbaycan Fövqəladə Hallar Nazirliyinin (FHN) yaranmasının 8-ci ildönümü münasibətilə FHN-in Cənub Regional Mərkəzində təntənəli mərasim keçirilib.
APA-nın cənub bürosunun məlumatına görə, FHN Cənub Regional Mərkəzinin şəxsi heyətinin, DYNX-nin Cənub Regional Dövlət Yanğın Nəzarəti İdarəsi, DSXX-nin Cənub dalğıc-axtarış qrupu və Lənkəran xilasetmə məntəqəsi, Kiçik Həcmli Gəmilərin Dövlət Müfəttişliyinin Cənub Regional şöbəsi, DYMX-nin Lənkəran rayon Dövlət Yanğından Mühafizə Hissəsi, Cənub Regional Sənayedə işlərin təhlükəsiz görülməsi və dağ-mədən nəzarəti müfəttişliyi əməkdaşlarının, Lənkəran Şəhər İcra Hakimiyyəti və yerli kütləvi informasiya vasitələri nümayəndələrinin iştirakı ilə keçən tədbir Heydər Əliyevin abidəsi önünə gül-çiçək dəstələrinin qoyulması ilə başlayıb.
Daha sonra FHN-in ötən 8 il ərzində strukturunun təkmilləşdirilməsi, maddi-texniki bazasının möhkəmləndirilməsi, kadr potensialının gücləndirilməsi, beynəlxalq əlaqələrin inkişafı sahəsində mühüm işlərin görülməsi ilə əlaqədar məruzələr dinlənilib.
Bütün çıxışlarda bir daha fövqəladə hallar sahəsində etibarlı şəbəkənin yaradılması, mülki müdafiə, əhalinin və ərazilərin təbii və texnogen hallardan, mümkün terror hadisələrindən qorunması, yanğın təhlükəsizliyinin və su hövzələrində insanların təhlükəsizliyinin təmin olunması ilə bağlı əhalinin təhlükəsiz yaşaması istiqamətində vacib olan işlərin geniş miqyasda həyata keçirildiyi, Fövqəladə Hallar Nazirliyi tərəfindən tabeliyinə verilən və yeni yaradılan qurumlarında işin daha səmərəli, operativ və çevik olması məqsədilə normativ-hüquqi bazanın möhkəmləndirildiyi, fövqəladə halların idarə olunması üzrə böyük təcrübəyə malik dövlətlərlə intensiv əməkdaşlıq münasibətləri qurulması istiqamətində ciddi addımların atıldığı qeyd olunub.
Tədbir zamanı həmçinin “Azərbaycan Respublikası Fövqəladə Hallar Nazirliyi əhalinin təhlükəsizliyinin keşiyindədir” adlı video çarx nümayiş etdirilib.