Bakı. Aqşin Rafiqoğlu – APA-Economics. Bakı-2015 Birinci Avropa Oyunları zamanı yarışların keçiriləcəyi idman arenalarının ətrafında parklanmaya nəzarət zonaları yaradılacaq.
“APA-Economics”in verdiyi xəbərə görə, bunu bu gün Nəqliyyat Nazirliyinin Nəqliyyatı İntellektual İdarəetmə Mərkəzində (NİİM) keçirilən tədbirdə Bakı-2015 Avropa Oyunları Əməliyyat Komitəsinin (BEGOC) Nəqliyyat idarəsinin nəqliyyat kommunikasiyası üzrə meneceri Afaq Hüseynli bildirib.
Onun sözlərinə görə, bununla bağlı qadağalar iyunun 1-dən qüvvəyə minəcək: "Bu zonalarda avtomobillərini yalnız xüsusi parklanma icazəsi olanlar, o ərazidə yaşayan sakinlər saxlaya bilərlər”.
O bildirib ki, belə bir icazəsi olmayan sakinlər mütləq bu tarixə qədər mənzil-kommunal idarələrinə müraciət etməlidirlər: “Həmin zonada rəsmi saxlama icazəsi olmayan avtomobillər ərazidən təxliyə olunacaq və onların sahibləri cərimələnəcəklər. Ümumiyyətlə, xahiş edirik ki, bu günlərdə sürücülər qeyri-qanuni parkinq etməsinlər və xoşagəlməz hallardan uzaq olmaq üçün ictimai nəqliyyatla hərəkət etsinlər".
A. Hüseynli deyib ki, Bakıya Avropa Oyunları ilə əlaqədar uzaqdan gələn tamaşaçılar avtomobillərini Mərkəzi Parkda ( Qış parkı) və Gənclik metrosunun yaxınlığında yerləşən parkdakı dayanacaqda saxlayıb idman arenalarına gedə bilərlər. Onlar üçün güzəştli tarif müəyyən edilib. Bunun üçün onlar cəmi 1 manat ödəməli olacaqlar”.
BEGOC rəsmisi əlavə edib ki, "express" avtobusların xidmətindən akkreditasiya olunmuş və bileti olanlar pulsuz istifadə edə biləcəklər: “Lakin arenalardan bilet almaq istəyənlər də şəxsiyyət vəsiqəsini göstərməklə bu avtobusların xidmətindən pulsuz istifadə edə bilərlər”.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
