SOCAR sovet dövründən qalan və artıq istismar edilməyən yüzlərlə quyu ilə bağlı işlər həyata keçirir.
“APA-Economics” xəbər verir ki, bunu II Azərbaycan Beynəlxalq İnvestisiya Forumu çərçivəsində keçirilən panel müzakirəsində SOCAR-ın vitse-prezidentinin müavini Hikmət Abdullayev bildirib.
Hikmət Abdullayev qeyd edib ki, bu quyuların bir hissəsinin ətrafındakı infrastruktur dağılıb və nəticədə həmin obyektlərə çıxış ciddi şəkildə məhdudlaşıb. Digər quyularda isə işlərin aparılması texniki baxımdan daha asandır və SOCAR artıq bu istiqamətdə işlər görür.
Onun sözlərinə görə, proses ilkin tədqiqatların aparılması, məlumatların toplanması, müvafiq icazələrin alınması və görülən işlərdən sonra monitorinqin həyata keçirilməsi daxil olmaqla bir sıra mərhələləri əhatə edir.
Hikmət Abdullayev bildirib ki, əlçatan və texniki baxımdan mürəkkəb olmayan quyularda bütün zəruri dövlət icazələri alındıqdan sonra işlərin görülməsi təxminən bir ay çəkə bilər.
“Daha mürəkkəb hallarda isə proses bir il çəkə bilər. Çünki burada mövcud olmayan müəyyən avadanlıqların idxalına ehtiyac yaranır, daha ətraflı qiymətləndirmələr aparılmalı, ROV-lar vasitəsilə sualtı tədqiqatlar həyata keçirilməlidir”, – Hikmət Abdullayev bildirib.
SOCAR-ın vitse-prezidentinin müavini əlavə edib ki, mürəkkəb texniki məsələlərin həlli üçün beynəlxalq ekspertlərin bilik və təcrübəsindən də istifadə olunur. Xarici mütəxəssislərin cəlb edildiyi layihələrdə yerli komandaların iştirakı əsas şərtlərdən biridir.
Hikmət Abdullayevin sözlərinə görə, yerli mütəxəssislərin layihələrin icrası prosesində təcrübə qazanması nəzərdə tutulur və məqsəd gələcəkdə bu işlərin SOCAR-ın yerli komandaları tərəfindən müstəqil şəkildə həyata keçirilməsidir.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
