İnfrastruktur

Ana səhifə

İnfrastruktur

Bu il Azərbaycanda 114 mindən artıq daşınmaz əmlak qeydiyyata alınıb

16 oktyabr 2012 13:43 (UTC +04:00)

Bakı. Əli Əhmədov - APA-Economics. Bu ilin yanvar-sentyabr aylarında Azərbaycnda 114 mindən çox daşınmaz əmlak obyekti üzərində mülkiyyət hüquqları qeydiyyata alınıb. «APA-Economics»in məlumatına görə, bu barədə Əmlak Məsələləri Dövlət Komitəsində ilk 9 ayda görülmüş işlər və qarşıda duran vəzifələrə dair keçirilən iclasda bildirilib. Qeydiyyata alınan əmlakların 33 minə yaxını ilkin, 81 mindən çoxu isə təkrar qeydiyyata aid olub.

Bununla yanaşı, hesabat müddətində 25 min ipoteka müqaviləsi dövlət qeydiyyatına alınıb, hüquqi və fiziki şəxslərə dövlət reyestrindən 84 min məhdudiyyət arayışı, əhaliyə xidmətlə bağlı 21 minə yaxın digər müxtəlif məzmunlu arayışlar verilib, 107 min daşınmaz əmlaka texniki pasport tərtib edilib.

İclasda bildirilib ki, hesabat dövründə daşınmaz əmlakın qeydiyyatı sisteminin inkişaf etdirilməsi və qabaqcıl iş təcrübəsinin tətbiqi məqsədi ilə informasiya sistemləri və məlumat bazalarının mərkəzləşdirilməsi, korporativ şəbəkənin qurulması, ərazi qeydiyyat idarələrinin müasirləşdirilməsi, maddi-texniki təminatının yaxşılaşdırılması, arxivlərin elektron formata keçirilməsi, müasir texnologiyaların, avadanlıq və geodezik cihazların alınması, işçilərin bilik və bacarıqlarının artırılması sahələrində tədbirlər davam etdirilib. Eləcə də, Daşınmaz Əmlakın Qeydiyyatı Layihəsinə dair Azərbaycan ilə Beynəlxalq Yenidənqurma və İnkişaf Bankı (IBRD, Dünya Bankı Qrupu) arasında kredit sazişinin icrası ilə bağlı tədbirlər davam etdirilib.