Hadisə

Bakı – APA. Milli Təhlükəsizlik Nazirliyinin (MTN) həyata keçirdiyi əməliyyat tədbirləri nəticəsində insanların həlak olması məqsədilə terrorçuluq hərəkətlərinin törədilməsinə yönəlmiş hazırlığa və qanunsuz olaraq külli miqdarda odlu silah, döyüş sursatı, partlayıcı maddələrin, qurğuların əldə edilməsinə görə Azərbaycan vətəndaşları Mirzəyev Nəriman Xosrov oğlu və Rüstəmov Mirzəhməd Şakir oğlu şübhəli şəxs qismində tutulublar.

MTN-in İctimai Əlaqələr Mərkəzindən APA-ya verilən məlumata görə, faktla bağlı MTN İstintaq Baş İdarəsi tərəfindən Cinayət Məcəlləsinin 28,214.2.1, 28,214.2.3 (terrorçuluq, yəni odlu silahdan, silah qismində istifadə edilən predmetlərdən istifadə etməklə ictimai təhlükəsizliyi pozmaq, əhali arasında vahimə yaratmaq məqsədilə insanların həlak olması, onların sağlamlığına zərər vurulması, əhəmiyyətli əmlak ziyanının vurulması təhlükəsi yaradan partlayış, yanğın və digər hərəkətlər törətməyə hazırlıq) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini və döyüş sursatını əldə etmə, saxlama, daşıma) maddələri ilə cinayət işi başlanılıb. Nəriman Mirzəyev və Mirzəhməd Rüstəmov təqsirləndirilən şəxs qismində cəlb olunaraq məhkəmənin qərarı ilə barələrində həbs qətimkan tədbiri seçilib.

Məlumatda bildirilir ki, 2013-cü ilin oktyabr ayında İnternetdə «facebook» sosial şəbəkəsində “Enekin Skayvoker” adı ilə qeydiyyatdan keçmiş istifadəçi səhifəsində hazırda Qusar rayonunda olan “əmir Fərman Çətin”in “Şeyx Mirzahmad al-Qusari”dən Azərbaycanda şiələrə qarşı “cihad” etmək barədə fətva aldığına dair bəyanat yerləşdirilib.

Bundan başqa, “Enekin Skayvoker” profilində əlində soyuq silah qismində olan bıçaq tutmuş Fərman Çətinin və Şeyx Mirzahmad Əl-Qusarinin birlikdə fotoşəkili də yayımlanıb. Həmin fotoşəklin altında isə Azərbaycanda dini nifrət və ayrı-seçkilik zəminində qarşıdurma yaratmaq məqsədilə İslam dininin şiə təriqətinə mənsub olanlara qarşı “cihad etmək haqda fətva”, təhqir və hədə dolu digər ifadələrlə yanaşı, Bakıda fəaliyyət göstərən “Məşədi Dadaş” məscidinin axundu Həsənov Şahin Hüseyn oğlunun qətlə yetirilməsi barədə çağırışlar əksini tapıb.

Həyata keçirilmiş antiterror tədbirləri nəticəsində, özünü “Fərman Çətin” kimi qələmə verən şəxsin - Nəriman Mirzəyev, “Şeyx Mirzahmad Əl-Qusari”nin isə Mirzəhməd Rüstəmov olduqları müəyyən edilib.

Məlum olub ki, Nəriman Mirzəyev, Mirzəhməd Rüstəmov və qeyriləri 2012-ci ilin aprel ayında odlu silahdan və silah qismində istifadə edilən predmetlərdən istifadə etməklə terrorçuluq, yəni ictimai təhlükəsizliyi pozmaq, əhali arasında vahimə yaratmaq məqsədilə şiə təriqətinə mənsub şəxslərin həlak olması, onların sağlamlığına zərər vurulması, əhəmiyyətli əmlak ziyanının vurulması təhlükəsi yaradan partlayışların törədilməsi barədə öz aralarında razılığa gəliblər. Nəriman Mirzəyev, Mirzəhməd Rüstəmov və qeyriləri bu məqsədlə hazırda istintaqla araşdırılan yerdən və mənbədən xeyli sayda odlu silah və döyüş sursatı əldə edib, saxlayıb, daşıyıb və gəzdirinlər. Onlar şiə təriqətinə mənsub şəxslərin kütləvi toplaşdığı məkanlardan biri olan - Bakı şəhəri, Yasamal rayonundakı “Məşədi Dadaş” məscidinin partladılması üçün dini ibadətgah ətrafında müşahidələr aparıblar. Həmçinin Nəriman Mirzəyev cinayətin törədilməsindən sonra hüquq-mühafizə orqanlarının təqibindən yayınmaq, onlara qarşı silahlı müqavimət göstərmək üçün Mirzəhməd Rüstəmova Qusar rayonu ərazisindəki meşədə xüsusi gizlənc yerlərinin düzəldilməsini tapşırıb. Hazırlıq işlərini yekunlaşdırdıqdan sonra, öz ətraflarında həmfikir toplamaq üçün Nəriman Mirzəyev İnternetdə “facebook” sosial şəbəkəsində şiə təriqətinə mənsub şəxslərə qarşı “cihada başlamaq”, o cümlədən axund Şahin Həsənovu qətlə yetirmək kimi çağırışlar edib. Lakin onlar öz iradələrindən asılı olmayan səbəblərdən planlaşdırdıqları cinayəti başa çatdıra bilməyiblər.

MTN-in keçirdiyi təxirəsalınmaz əməliyyat tədbirləri ilə Nəriman Mirzəyev və Mirzəhməd Rüstəmov yaxalanıblar. Cinayət-prosessual qanunvericiliyin tələblərinə müvafiq olaraq keçirilmiş baxış nəticəsində Nəriman Mirzəyevin üzərindən təyinatı kustar üsulla dəyişdirilmiş 1 ədəd «Makarov MP 371» siqnalverici tapança, həmin tapança üçün 1 daraq və 8 patron, yaşadığı mənzildən 1 ədəd «Kalaşnikov» avtomat silahı, həmin silah üçün 1 daraq, 14 patron, 3 “F-1” tipli əl qumbarası və onlara aid 3 alışdırıcı, Mirzəhməd Rüstəmovun üzərindən təyinatı kustar üsulla dəyişdirilmiş 1 ədəd «Makarov MP 371» siqnalverici tapança, həmin tapança üçün 1 daraq və 8 patron, onun mənzilindən 2 “F-1” tipli əl qumbarası və onlara aid 2 alışdırıcısı aşkar olunaraq götürülüb.

Cinayət işi üzrə bütün halların araşdırılması, bu hüquqazidd əməllərin digər iştirakçılarının müəyyənləşdirilməsi üçün istintaq-əməliyyat tədbirləri davam etdirilir.

Qeyd edək ki, əməliyyatı əks etdirən video-çəkiliş bu gün telekanallarda nümayiş etdiriləcək.

Bir məqam xüsusi qeyd olunmalıdır. Azərbaycan tarix boyu fərqli millətlərə, dinlərə, təriqətlərə, məzhəblərə mənsub insanların dinc və mehribançılıq, qarşılıqlı hörmət şəraitində yaşadığı və dini-etnik zəmində indiyədək heç bir münaqişənin olmadığı nadir ölkələrdəndir. Bu gün müxtəlif siyasi, dini, etnik qarşıdurmalarla sürətlə qloballaşan dünya üçün Azərbaycan sabitlik, təhlükəsizlik və tolerantlıq nümunəsi kimi hər yerdə xüsusi qeyd olunur. Bu həm də ölkəmizdəki insan və vətəndaş hüquq və azadlıqlarına dərin hörmətin, vicdan azadlığının və mehriban birgəyaşayış mühitinin bariz sübutudur.

Respublikada həyata keçirilən fəal hüquq mühafizə siyasəti nəticəsində bundan əvvəl də xüsusi hazırlıqlı ekstremist və radikal dini təmayüllü silahlı birləşmələrin Azərbaycanda təxribat-pozuculuq fəaliyyətlərinin və terrorçuluq aksiyalarının qarşısı alınmışdır. Belə ki, 2008-ci ildə özlərini “əhli-sünnə məzhəbinə aid əsl müsəlmanlar” adlandıranların elə özlərinin də namaz qıldıqları “Əbu Bəkr” məscidində törətdikləri terrorçuluq aksiyası nəticəsində sünni məzhəbindən olan iki nəfər ölüb, 18 nəfər yaralanıb. Həmin ərəfədə, bu terrorçuların daha bir cinayət əməli - “dini baxışlarında yaranmış ziddiyyətlərlə əlaqədar” “Əbu Bəkr” məscidinin imamını qətlə yetirməyi planlaşdırmaları da əslində onların İslam dininə heç bir aidiyyətinin olmamasının və dindən yalnız öz cinayətkar əməllərini pərdələmək üçün istifadə etdiklərinin əyani sübutu idi.

Hüquq-mühafizə orqanlarının peşəkarlıqla həyata keçirdikləri əməliyyat-axtarış tədbirləri ilə bu ağır cinayətləri və digər qanunazidd hərəkətləri törədən şəxslər zərərsizləşdirilərək ədalət mühakiməsinə verildilər. Nəriman Mirzəyev və Mirzəhməd Rüstəmovun da yaxalanaraq ifşa edilmələri milliyyətindən, cinsindən, dinindən, məzhəbindən və əqidəsindən asılı olmayaraq hər bir kəsin qanun qarşısında məsuliyyət daşıdığının daha bir göstəricisidir. Törədilən hüquqazidd əmələ görə cəzanın labüdlüyü prinsipi hamıya aiddir. Cəmiyyətə zidd əməllərin, Azərbaycanın milli təhlükəsizliyi əleyhinə cinayətkar qəsdlərin və təhdidlərin qarşısı bundan sonra da qətiyyətlə alınacaq.