Bakı. Könül Kamilqızı – APA. Azərbaycan Milli Elmlər Akademiyasının (AMEA) Humanitar və İctimai Elmlər Bölməsinin akademik-katibi, Bakı Slavyan Universitetinin rektoru Kamal Abdullanın ötən il xarici ölkələrdə bir sıra kitabları işıq üzü görüb. AMEA-nın mətbuat xidmətindən APA-ya verilən xəbərə görə, müəllifin geniş oxucu auditoriyası qazanan “Yarımçıq əlyazma” romanı ingilis, alman, fransız və qazax dillərində çap olunub, ABŞ, Avstriya, Fransa və Qazaxıstanda təqdimatı keçirilib. Roman Fransada İNALKO professoru Klod Aliberin ön sözü ilə 2-ci dəfə çap olunub. Kitabın alman dilində nəşrinin fevralda Humbolt adına Berlin Universitetində də təqdimatı nəzərdə tutulur.
Yazarın “Sehrbazlar dərəsi” romanı Litvada və Yaponiyanın Osaka Universitetinin professoru Takayuki Murakaminin ön sözü ilə Yaponiyada oxucuların ixtiyarına verilib. K. Abdullanın bu il Türkiyədə çap olunmuş “Gizli Dədə Qorqud” kitabı Azərbaycan xalqının mədəni keçmişi və bədii təfəkkürün mifdən yazıya köçürüldüyü mərhələnin elmi tədqiqinin nəticəsidir.
Qeyd edək ki, ümumilikdə 11 dildə çap olunmuş “Yarımçıq əlyazma” romanının ingilis dilində ABŞ nəşri Avropa Azərbaycan Cəmiyyətinin dəstəyi ilə Londonun məşhur “Woters Stone” kitab evində, almanca versiyası isə Avstriyanın Qrass Universitetində çoxsaylı tərcüməçi, ingilisdilli və almandilli ədəbiyyat nümayəndələrinin iştirakı ilə ictimaiyyətə təqdim olunub, ətraflı müzakirə edilib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
