Bakı. Aqşin Rafiqoğlu – APA-Economics. Bu gün Sumqayıt Texnologiya Parkında (STP) Sənaye məhsullarının standartlaşdırılması üzrə Texniki Komitənin təqdimat mərasimi keçirilib.
«APA-Economics»in məlumatına görə, tədbirdə çıxış edən Standartlaşdırma, Metrologiya və Patent üzrə Dövlət Komitəsinin (SMPDK) sədri Ramiz Həsənov son 10 ildə Azərbaycanda sənaye məhsullarının istehsal həcminin 3 dəfəyə qədər artdığını bildirib.
Onun sözlərinə görə, ölkə başçısının sərəncamı ilə 2014-cü il Azərbaycanda «Sənaye ili» elan edilməsi ilə bu sahənin daha da inkişafı üçün zəmin hazırlayır: «Standartlaşdırma üzrə yeni texniki komitələrin yaradılması, onların beynəlxalq təcrübəyə uyğunlaşdırılması və bu texniki komitələr çərçivəsində beynəlxalq standartlarla harmonizə edilmiş yeni milli standartların hazırlanması qarşıda duran başlıca vəzifələrdən biridir. «Sənaye ili» ilə bağlı görüləcək tədbirlər çərçivəsində sənayenin infrastruktur təminatının yaxşılaşdırılması, ölkənin güclü sənaye mərkəzinə çevrilməsi istiqamətində mövcud potensialdan daha səmərəli istifadə etmək məqsədi ilə SMPDK-nın əmri ilə STP-nin bazasında Sənaye məhsullarının standartlaşdırılması üzrə yeni Texniki Komitə yaradılıb».
R.Həsənov qeyd edib ki, artıq bu Texniki Komitənin əsasnaməsi, strukturu, bu il üçün fəaliyyət planı təsdiq edilib: «Texniki Komitənin strukturuna «Sumqayıt Texnologiya Parkı» MMC və Standartlaşdırma və Sertifikatlaşdırma İnstitutu ilə yanaşı, Polimer məmulatların standartlaşdırılması, Elektrik məmulatların standartlaşdırılması, Tikinti materiallarının, dəmir-beton məmulatlarının və metal konstruksiyaların standartlaşdırılması və Maşınqayırma üzrə dövl Alt Komitə də daxildir».
Dövlət Komitəsinin sədri deyib ki, Texniki Komitənin əsas məqsədi ölkədə istehsal olunan sənaye məhsullarının xarici bazara çıxarılmasının təmin edilməsidir: «Həmçinin, bu məhsulların rəqabət qabiliyyətinin artırılması istiqamətində yeni beynəlxalq tələblərə cavab verən milli standartların işlənib hazırlanması və bu sahədə fəaliyyət göstərən beynəlxalq texniki komitələrlə əlaqələrin genişləndirilməsi nəzərdə tutulub».
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
