APA-nın məlumatına görə, iclas barədə yayılan press-relizdə bildirilir ki, toplantıda vətəndaşlar tərəfindən daxil olunan şikayət ərizələrinə və müraciətlərə baxılıb və İşçi Qrupunun növbəti iclasının gündəliyinə bunlarla bağlı məsələnin salınması müəyyən olunub.
Daha sonra hüquq müdafiəçiləri prezident İlham Əliyevə növbəti əfv fərmanı ilə bağlı müraciət qəbul ediblər.
Hüquq müdafiəçiləri Müsavat Partiyasının başqan müavini, Qarabağ müharibəsinin veteranı Tofiq Yaqublunun azadlığa buraxılması ilə bağlı dövlət başçısına vəsatətlə müraciət ediblər.
Bakıda keçiriləcək ilk Avropa Oyunlarına yüksək dəyər verən hüquq müdafiəçiləri millət vəkili, Heydər Əliyev Fondunun prezidenti, Avropa Oyunları üzrə Təşkilat Komitəsinin sədri Mehriban Əliyevaya Avropa Oyunları ərəfəsində bir sıra məhbusların azad olunmasına səy göstərməsi xahişi ilə də müraciət qəbul ediblər.
***
18:33
Bakı. Fərid Mirzəyev – APA. Bu gün Azərbaycan prezidenti İlham Əliyevin və Avropa Şurasının baş katibi Tyorbyorn Yaqlandın təşəbbüsü ilə fəaliyyətini bərpa edən İnsan Hüquqları üzrə Birləşmiş Qrupda təmsil olunan qeyri-hökumət təşkilatlarının toplantısı keçirilib.
Bu barədə APA-ya İnsan Hüquqları üzrə Birləşmiş Qrupda təmsil olunan hüquq müdafiəçisi Arzu Abdullayeva məlumat verib.
A. Abdullayevanın sözlərinə görə, toplantıda Birləşmiş Qrupda təmsil olunan 11 QHT-nin rəhbəri iştirak edib: “İclasda Heydər Əliyev Fondunun prezidenti, millət vəkili Mehriban Əliyevaya mayın sonunda əfvlə bağlı müraciət olunub. Müraciətdə NİDA hərəkatının üzvlərinin, Əli İnsanovun, İlqar Məmmədovun, Arif Yunusun, Leyla Yunusun, Rəsul Cəfərovun, İntiqam Əliyevin, Hilal Məmmədovun, Xədicə İsmayılın və digərlərinin əfv olunması xahiş edilib. Daha bir müraciət isə Tofiq Yaqublunun əfv ilə bağlı Azərbaycan prezidenti İlham Əliyevə ünvanlanıb. Biz istəyirik ki, Tofiq Yaqublu qızının yas mərasimindən sonra həbsxanaya geri dönməsin”.
Qeyd edək ki, Azərbaycan vətəndaş cəmiyyətinin və hakimiyyətinin nümayəndələrindən ibarət İnsan Hüquqları üzrə Birləşmiş Qrup Azərbaycan prezidenti İlham Əliyevin və Avropa Şurasının baş katibi Tyorbyorn Yaqlandın təşəbbüsü ilə fəaliyyətini bərpa edərək 2014-cü il oktyabrın 22-də ilk iclasını keçirib. Qrupun həmsədrləri Prezident Administrasiyası hüquq-mühafizə orqanları ilə iş şöbəsinin müdiri Fuad Ələsgərov və Azərbaycanın AŞPA-dakı nümayəndə heyətinin rəhbəri Səməd Seyidov, katibliyə isə hüquq müdafiəçiləri Səadət Bənənyarlı və Sahib Məmmədov seçiliblər. Qrupun son iclası 9 aprel 2015-ci ildə Avropa Şurasının baş katibi Tyorbyorn Yaqlandın xüsusi nümayəndəsi, AŞ-nin siyasi işlər üzrə şöbə müdiri Aleksander Gesselin iştirakı ilə keçirilib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
