Bakı. Musa Əhmədov - APA-Economics. İqtisadi İslahatların Təhlili və Kommunikasiya Mərkəzi "Qanunvericiliyin təsirinin qiymətləndirilməsi" mövzusunda seminar keçirir.
Mərkəzdən “APA-Economics”ə verilən məlumata görə, seminarın məqsədi ölkədə aparılan iqtisadi islahatların təsirinin qiymətləndirilməsi sahəsində kadr hazırlığına töhfə vermək.
Seminar OECD-nin Tənzimləmə Siyasəti Komitəsinin vitse-prezident vəzifəsində Fransanın rəsmi nümayəndəsi olmuş və "Qanunvericiliyin təsirinin qiymətləndirilməsi" üzrə beynəlxalq səviyyədə tanınmış ekspert Çarlz-Henri Montin tərəfindən aparılıb.
"Japan Tobacco" şirkətlər qrupunun üzvü və dünyanın aparıcı beynəlxalq tütün şirkəti olan JTI (Japan Tobacco International) seminarın keçirilməsinə ekspert dəstəyi verib.
Tənzimləmə siyasəti və idarəçilik məsələləri, Avropa Komissiyasında və digər ölkələrdə "Qanunvericiliyin təsirinin qiymətləndirilməsi" sxemlərinin qiymətləndirilməsi və Azərbaycanda qiymətləndirmə sisteminin qurulmasına dair mövzulara həsr olunmuş bu seminar dövlət və biznes qurumlarının tənzimləmə və idarəçilik siyasəti üzrə yüksək vəzifəli rəsmiləri üçün nəzərdə tutulub.
Seminarda nazirliklərin, dövlət komitə, agentlik və xidmətlərinin, habelə universitet və özəl sektorun nümayəndələri iştirak ediblər. Sonda iştirakçılar İqtisadi İslahatların Təhlili və Kommunikasiya Mərkəzi və "Japan Tobacco" şirkətlər qrupunun təqdim etdiyi sertifikatlarla təltif olunublar.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
