Ramil Usubov Avropa Şurasının nümayəndə heyətini qəbul edib

Ramil Usubov Avropa Şurasının nümayəndə heyətini qəbul edib
# 16 fevral 2017 15:21 (UTC +04:00)

Daxili işlər naziri, general-polkovnik Ramil Usubov Avropa Şurasının İşgəncələrin, qeyri-insani və ləyaqəti alçaldan rəftarın və ya cəzanın qarşısının alınması üzrə Komitəsinin prezidenti Mikola Qnatovskinin rəhbərlik etdiyi nümayəndə heyətini qəbul edib.

DİN-in mətbuat xidmətindən APA-ya verilən məlumata görə, nazir DİN ilə Avropa Şurası arasında sıx və işgüzar əlaqələrin mövcud olduğunu, bu əməkdaşlıq çərçivəsində insan hüquq və azadlıqlarının təmin olunması üzrə həyata keçirilən tədbirlərin böyük əhəmiyyət kəsb etdiyini nəzərə çatdırıb. O deyib ki, ölkəmiz hələ Avropa Şurasının üzvü olmazdan əvvəl, ötən əsrin 90-cı illərinin sonlarında Avropanın qabaqcıl ölkələrindən, mötəbər beynəlxalq təşkilatlardan olan ekspertlərin yaxından iştirakı ilə polisin fəaliyyətini tənzimləyən, insan və vətəndaş hüquq və azadlıqlarının qorunmasının prioritet təşkil etdiyi bir sıra yeni qanunvericilik aktları qəbul edilib, onların tətbiqi sahəsində müsbət təcrübə əldə olunub, Azərbaycan Respublikası insan hüquqları sahəsində əsas beynəlxalq sənədlərə, o cümlədən konvensiyalara qoşulub.

Ramil Usubov qonaqların nəzərinə çatdırıb ki, ölkəmiz Avropa Şurası ilə demokratik dövlət quruculuğu, insan hüquqlarına hörmət və ölkədə qanunun aliliyinin təmin edilməsi sahəsində hərtərəfli əməkdaşlığa böyük önəm verir və bu faydalı işbirliyinin davamlı inkişafında maraqlıdır.

Ötən ilin mart ayının sonunda cənab Mikola Qnatovskinin başçılıq etdiyi nümayəndə heyətinin ölkəmizə səfəri zamanı polis orqanlarının müvəqqəti saxlama yerlərində monitorinq keçirdiyini xatırladan nazir saxlanma şəraitinin daha da yaxşılaşdırılması ilə əlaqədar verilmiş tövsiyələrin nəzərə alınmasını Daxil İşlər Nazirliyi ilə Avropa Şurasının müvafiq strukturları arasında səmərəli əməkdaşlığın növbəti əyani təzahürü kimi dəyərləndirərək, bu istiqamətdə görülmüş işlərdən danışıb. Ərazi polis orqanlarının müvəqqəti saxlama yerlərinin müasir standartlara uyğun yenidən qurulması sahəsində də zəruri tədbirlərin görüldüyü, o cümlədən müasir informasiya texnologiyalarının imkanlarından geniş istifadə olunduğu, hökumət, eləcə də qeyri-hökumət təşkilatlarından olan müşahidəçilərin həmin yerlərdə azad və məhdudiyyətsiz monitorinq keçirmələrinə lazımi şəraitin yaradıldığı diqqətə çatdırılıb.

Nazir respublikada ictimai asayişin və təhlükəsizliyin təmin edilməsində digər dövlət orqanları ilə bərabər, vətəndaş cəmiyyəti və kütləvi informasiya vasitələri ilə qarşılıqlı əməkdaşlıq çərçivəsində də zəruri tədbirlərin həyata keçirildiyini bildirib. Həmçinin, cəmiyyətdə polisin nüfuzuna və işgüzar imicinə xələl gətirməkdə maraqlı olan bəzi şəxslərin bu mövzuda ictimai rəyi çaşdırmağa yönəlmiş cəhdləri, nüfuzlu beynəlxalq təşkilatlara, o cümlədən Avropa Şurasına qərəzli olaraq əsassız və qeyri-obyektiv müraciətlər ünvanlamaları təəssüflə qeyd olunub.

Mikola Qnatovski rəhbərlik etdiyi qurum tərəfindən ötən il həyata keçirilmiş monitorinq zamanı aşkarlanan çatışmazlıqların qısa müddətdə aradan qaldırılmasından, verilən tövsiyələrin nəzərə alınmasından, eyni zamanda, insan və vətəndaş hüquq və azadlıqlarının pozulması hallarına Nazirliyin rəhbərliyinin hər zaman prinsipial mövqedən yanaşmasından məmnunluğunu ifadə edib, qarşılıqlı faydalı əməkdaşlığın bundan sonra da davam etdirilməsində maraqlı olduqlarını vurğulayıb.

Görüşdə tərəfləri maraqlandıran bir sıra digər məsələlər də müzakirə olunub.

#
#

ƏMƏLİYYAT İCRA OLUNUR