"Azərbaycan Beynəlxalq Bankı" ASC-nin (ABB) Rusiyadakı törəməsi "ABB-Moskva" MMC-də yerləşdirilən depozitlərin həcmi cari ilin iyulun 1-nə 9,45 mlrd. rubl təşkil edib.
"APA-Economics" xəbər verir ki, bu göstərici ilə törəmə Rusiya banklarının depozitlərin həcminə görə renkinqində 114-cü pillədə qərarlaşıb. Siyahıda 566 bank yer alıb.
Cari ilin aprel ayının 1-nə bank 112-ci pillədə idi. Beləliklə, ikinci rübdə bank 2 pillə geriləyib.
Geriləmənin səbəbinə gəlincə, ikinci rübdə bankın depozit portfeli 6,4% azalıb. Ümumilikdə ilin ilk yarısında bankın depozit portfeli 24,1% daralıb.
Portfelin 28,7%-i xarici valyutanın (rubl olmayan) payına düşür.
İyulun 1-nə öhdəliklərin 42,3%-i depozit portfelinin hesabına formalaşıb.
"ABB-Moskva" 2002-ci ilin yanvarında təsis olunub. 2004-cü ildən etibarən bank Rusiyanın Əmanətlərin Sığortalanması Sisteminə daxil olunub. Hazırda bankın səhmlərinin 100%-i ABB-yə məxsusdur.